Read Papiamento 1 Reinan 6 Bible Online

1 Reinan 6 - Papiamento bible

1 Reinan 6

¹A pasa 480 aña ku e israelitanan a sali for di Egipto. Den e di kuater aña ku Salomon tabata goberná Israel, den luna di Ziu, e di dos luna di aña, Salomon a kuminsá traha tèmpel di SEÑOR.

²E tèmpel ku rei Salomon a traha pa SEÑOR tabata trinta meter largu, dies meter hanchu i diessinku meter altu.

³E portal dilanti di e sala grandi den tèmpel tabata dies meter largu meskos ku hanchura di e tèmpel i sinku meter hundu.

⁴Den tèmpel mes Salomon a laga traha bentana ku trali.

⁵Kontra e murayanan di tèmpel, esta kontra e sala grandi i e sala patras, el a laga traha un adrei ku diferente piso.

⁶E promé tabata dos meter i mei hanchu, esun meimei tres meter i esun mas altu tres meter i mei. Esei ta pa motibu ku el a laga e muraya parti pafó di e tèmpel bai un poko aden pa no mester a hinka biga den dje.

⁷Pa konstruí e tèmpel a usa piedra manera a kap nan saka for di seru. Asina ta ku no tabata tende batimentu di martin ni di beitel ni di ningun otro hèrmènt di heru den tèmpel.

⁸E porta di e promé piso tabata na man drechi di e tèmpel i pa bai na e di dos i e di tres piso, un trapi tabata lora bai ariba.

⁹Ora Salomon a kaba di traha kurpa di e tèmpel, el a pone plafòn di tabla i balki di palu di seder.

¹⁰E pisonan ku el a traha kontra e tèmpel tabata dos meter i mei altu. Nan tabata pegá na e tèmpel ku balki di seder.

¹¹Salomon a haña un palabra di SEÑOR:

¹²‘Pa loke ta trata e tèmpel ku bo ta traha, Mi ker a bisa bo ku, si bo komportá bo segun mi leinan i tene bo na mi dekretonan, si bo kumpli ku tur mi mandamentunan i biba di akuerdo ku nan, lo Mi kumpli dor di bo ku e promesa ku Mi a hasi David, bo tata.

¹³Lo Mi biba meimei di e israelitanan i lo Mi no bandoná mi pueblo Israel.’

¹⁴Ora Salomon a keda kla ku trahamentu di e tèmpel,

¹⁵el a fura e murayanan parti paden di abou te ariba ku palu di seder, pero e flur el a tapa ku tabla di siprès.

¹⁶Parti patras den e tèmpel el a skòt un espasio di dies meter di ariba te abou ku palu di seder. Esei tabata e sala patras, e lugá santísimo.

¹⁷E sala grandi, ku tabata nèt enfrente di e sala patras tabata binti meter largu.

¹⁸Den e palu di seder, ku a fura parti paden di e tèmpel kuné, tabatin figura di pampuna i di flor kòrtá. Tur kos tabata di palu di seder. No tabata mira ningun piedra.

¹⁹Den e parti mas paden di e tèmpel Salomon a traha e sala patras, pa pone arka di aliansa di SEÑOR aden.

²⁰E sala ei tabata dies meter largu, dies meter hanchu, i dies meter altu. Salomon a fur'é ku oro puru. Dilanti di e sala el a traha un altá di palu di seder i a fur'é tambe ku oro.

²¹Salomon a fura parti paden di e tèmpel ku oro puru i dilanti di e sala patras, ku tambe tabata furá ku oro, el a span kadena di oro.

²²Sí, el a fura e tèmpel kompleto ku oro. E altá ku tabata pertenesé na e sala patras tambe el a fura ku oro.

²³Den e sala ei el a traha dos kerubin di palu di oleifi shimaron. Kada un tabata sinku meter altu.

²⁴Kada ala tabata midi dos meter i mei: di un punta di ala pa e otro tabatin un distansia di sinku meter.

²⁵E di dos kerubin tambe tabata sinku meter hanchu; ke men, nan dos tabatin e mesun tamaño i e mesun forma.

²⁶Tambe kada kerubin tabata sinku meter altu.

²⁷Salomon a pone nan den e sala mas paden di e tèmpel. E kerubinnan tabatin nan alanan habrí asina ku ala di esun tabata mishi ku un banda di muraya i ala di e otro tabata mishi ku e otro muraya, e otro dos alanan tabata topa ku otro nèt meimei di e tèmpel.

²⁸Salomon a fura e angelnan ku oro.

²⁹Den tur e murayanan di e tèmpel, tantu den e sala mas paden komo den esun dilanti di dje, el a traha figura di kerubin, di palma i di kònòpi di flor medio habrí.

³⁰Tambe el a fura e flur di e dos salanan ei ku oro.

³¹Na entrada di e sala patras el a laga traha blat di porta di palu di oleifi shimaron; e kozein tabata furá ku sinku dèk di palu, kada un un tiki mas chikí ku e otro.

³²E dos blatnan di porta tabata di palu di oleifi shimaron, ku figura di kerubin, di palma i kònòpi di flor medio habrí kòrtá den e palu. Despues el a fura tur e figuranan akí ku oro.

³³Na entrada di e sala grandi di tèmpel tambe el a traha un kozein di palu di oleifi shimaron. Pero esei tabata furá ku kuater dèk di palu;

³⁴e dos blatnan di porta tabata di palu di siprès. Kada blat tabata konsistí di dos mitar ku por a move.

³⁵Den nan el a laga graba figura di kerubin, di palma i di kònòpi di flor medio habrí, i el a fura tur ku plachi fini di oro.

³⁶E plenchi sentral el a sera ku un muraya di tres kareda di piedra kòrtá na midí i un kareda di balki di palu di seder.

³⁷Den e di kuater aña, den luna di Ziu, nan a pone fundeshi di e tèmpel di SEÑOR;

³⁸i den e di diesun aña, den luna di Bul, ku ta di ocho luna di aña, e tèmpel a keda kla, kompletamente segun plan den tur detaye. Asina ta ku Salomon a kaba e tèmpel den shete aña.