Read Papiamento 2 Reinan 9 Bible Online

2 Reinan 9 - Papiamento bible

2 Reinan 9

¹Profeta Eliseo a yama un di e miembronan di e grupo di profeta i bis'é: ‘Faha bo sintura i bai Ramot-Guilead ku e butishi di zeta di oleifi akí.

²Ora bo yega aya, bai buska Yehu, yu di Yoshafat, i ñetu di Nimshi. Bai serka dje, separ'é di e otro ofisialnan i hib'é den un kamber apartá.

³E ora ei kohe e butishi i basha e zeta riba su kabes ku e palabranan: “SEÑOR ta bisa: Mi ta konsagrá bo rei di Israel.” Despues bo ta habri e porta i hui bai mesora.’

⁴Asin'ei e profeta hóben a bai Ramot-Guilead.

⁵Ora el a yega aya, el a haña e alto ofisialnan di ehérsito sintá huntu. El a bisa: ‘Ofisial, mi tin un rospondi pa bo.’ ‘Pa kua di nos?’ Yehu a puntra. E profeta a kontestá: ‘Pa bo, ofisial.’

⁶E ora ei Yehu a lanta drenta kas. E profeta a basha e zeta riba kabes di Yehu ku e palabranan: ‘SEÑOR, Dios di Israel, ta bisa: “Mi ta konsagrá bo rei di mi pueblo Israel.

⁷Lo bo kaba ku kas real di Ahab, bo shon, pa asina Mi venga e sanger ku Izebel a drama di mi profetanan i di tur mi otro sirbidónan.

⁸Kas real di Ahab lo ta destruí por kompleto, lo Mi kaba ku tur e machunan den famia di Ahab, na Israel, sin hasi niun eksepshon.

⁹Mi ta bai hasi ku kas real di Ahab meskos ku Mi a hasi ku kas di Yerobeam, yu di Nebat, i ku kas di Basha, yu di Ahías.

¹⁰Tokante Izebel, kachónan lo kom'é den kunuku di Yizreel i ningun hende lo no der'é.” ’ Pareu ku el a bisa asina, el a habri e porta hui bai.

¹¹Ora Yehu a bai bèk serka e ofisialnan di rei, un di nan a puntr'é: ‘Tur kos ta bon? Pakiko e loko ei tabatin mester di bo?’ El a kontestá nan: ‘Ai, boso konos'é e hòmber ei i su manera di papia.’

¹²‘No lora lenga, konta nos pa kaba,’ nan a kontestá. E ora ei Yehu a bisa nan: ‘Wèl, el a bisa mi ku SEÑOR ta konsagrá mi rei di Israel.’

¹³Lihé nan a kohe nan mantel habri abou riba e trapi dilanti di Yehu. Nan a supla kachu i grita: ‘Yehu ta rei!’

¹⁴Despues Yehu, yu di Yoshafat, i ñetu di Nimshi, a traha un kòmplòt kontra Yoram. Tabata asina ku rei Yoram i henter Israel a defendé Ramot-Guilead kontra Hazael, rei di Aram.

¹⁵Pero Yoram a bai Yizreel bèk pa kura di e heridanan ku el a haña den guera. Awor Yehu a bisa: ‘Si boso ta bai di akuerdo ku mi, no laga ningun hende skapa for di siudat pa bai konta na Yizreel loke a pasa.’

¹⁶Yehu a subi su garoshi bai Yizreel, kaminda Yoram tabata malu na kama i pa e motibu akí tabatin bishita di Ahazías, rei di Huda.

¹⁷Ora e guardia riba dak di e toren di Yizreel a mira Yehu i su grupo ta bini, el a grita: ‘Tin un grupo di hende ta bini ei!’ Yoram a ordená pa manda un sòldá di kabayeria bai kontra nan i puntra nan si tur kos ta bon.

¹⁸E sòldá riba kabai a bai kontra Yehu i a bis'é ku rei ta laga puntra si tur kos ta bon. Yehu a kontestá: ‘No ta bo asuntu, bira ban ku nos!’ E guardia a duna e notisia: ‘E mensahero a yega serka nan, pero e no ta bini bèk.’

¹⁹Yoram a manda un di dos sòldá di kabayeria. Esaki tambe a yega serka nan i a bisa ku rei ta laga puntra si tur kos ta bon. Yehu a kontestá: ‘No ta bo asuntu, bira bo ban ku nos!’

²⁰E guardia a bolbe duna e notisia: ‘E mensahero a yega serka nan, pero e no ta bini bèk. Parse ku esun ku ta manehá e garoshi ta Yehu, ñetu di Nimshi, ta e so sa manehá manera loko asina.’

²¹Yoram a ordená: ‘Prepará mi garoshi.’ Ora nan a hasi esei, Yoram, rei di Israel, i Ahazías, rei di Huda, a sali, kada unu ku su mes garoshi, pa topa ku Yehu. Nan a top'é den kunuku di Nabot di Yizreel.

²²Asina Yoram a weta Yehu, el a puntra: ‘Tur kos ta bon, Yehu?’ Esaki a kontestá: ‘Kon tur kos por ta bon, tanten bo mama Izebel ta sigui praktiká prostitushon[5] i tur sorto di bruheria?’

²³Yoram a bira su garoshi i a hui miéntras el a grita: ‘Traishon, Ahazías!’

²⁴Pero Yehu a span su bog i e flecha a alkansá Yoram meimei di su skoudernan bora su kurason. El a sak den otro den su garoshi.

²⁵‘His'é bent'é den kunuku di Nabot di Yizreel,’ Yehu a bisa su ofisial di konfiansa Bidkar. ‘Pasobra bo no ta kòrda e dia ku mi ku bo tabata kore kabai tras di su tata Ahab ku SEÑOR a bis'é lo siguiente:

²⁶“Ayera nochi Mi a weta sanger di Nabot i su yu hòmbernan kore; Mi ta sigurá bo ku lo Mi laga bo paga pa esei den e mesun kunuku ei!” P'esei his'é bent'é den e kunuku, segun palabra di SEÑOR.’

²⁷Ora Ahazías, rei di Huda, a mira loke tabata pasando, el a hui bai Bet-Hagan. Pero Yehu a persiguié i ordená: ‘Tira é tambe!’ Esaki a sosodé na subida di e kaminda pa Hur, serka Yibleam. Ahazías a hui bai Megido, aya el a muri.

²⁸Su sirbidónan a hib'é Herusalèm den garoshi i der'é den su mes graf serka su famia den siudat di David.

²⁹Ahazías a kuminsá goberná na Huda tempu Yoram, yu di Ahab, tabatin diesun aña rei.

³⁰Yehu a bai Yizreel. Ora Izebel a tende esei, el a pinta su wowonan pretu, drecha su kabei, bai para den bentana wak afó.

³¹Ora Yehu a yega na porta di siudat, Izebel a grita: ‘Kon ta bai, Zimri,[6] burdugu di bo shon.’

³²Yehu a wak ariba na e bentana i bisa: ‘Ken ta na mi fabor, ken?’ Dos, tres funshonario di korte a sali wak abou.

³³Yehu a ordená: ‘Tir'é for di bentana!’ Nan a tir'é i su sanger a spat tur riba e muraya i riba e kabainan. Yehu a pasa ku su garoshi ku kabainan riba dje.

³⁴Djei el a drenta paden i a sinta kome i bebe. Despues el a bisa: ‘Wak pa dera e muhé maldishoná ei, al fin i al kabo ta yu di un rei e ta.’

³⁵Pero ora nan a bai pa der'é, nan a haña solamente su karpachi, pianan i mannan.

³⁶Ora nan a bini bèk i a konta Yehu loke a pasa, el a bisa: ‘A sosodé presis manera SEÑOR a papia pa boka di su sirbidó Elías di Tisbe: “Den kunuku di Yizreel kachónan lo kome karni di Izebel.

³⁷Manera mèst ta keda den kunuku, asina Izebel lo keda den kunuku di Yizreel. Ningun hende lo no por bisa ku ta Izebel esei ta.” ’