Read Papiamento 1 Krónikanan 13 Bible Online

1 Krónikanan 13 - Papiamento bible

1 Krónikanan 13

¹David a konsultá ku tur e hefenan di mil i di shen sòldá, esta ku kada komandante.

²Ora henter Israel tabata reuní, el a bisa: ‘Si boso ta bai di akuerdo ku mi i si ta boluntat di SEÑOR, laga nos manda mensahero tur parti di Israel. Nan mester bisa nos kompatriotanan ku no ta presente aki pa nan bini serka nos. E saserdotenan i e levitanan, ku ta biba na e lugánan destiná pa nan, tambe mester bini.

³Mi ta proponé pa nos hiba e arka di aliansa di nos Dios Herusalèm, pasobra den tempu di Saul nos no a paga atenshon n'e.’

⁴Tur hende den e reunion a haña ku ta un bon idea i nan a disidí di hasi asina.

⁵Di e manera ei David a reuní tur israelita for di riu Nilo na Egipto den zùit te na Lebo-Hamat den nort, pa trese e arka di Dios for di Kiriat-Yearim.

⁶David i tur e israelitanan a sali bai Baala, yamá tambe Kiriat-Yearim, ku ta pertenesé na Huda, pa fo'i djei nan bai ku e arka di Dios, e arka ku ta ligá ku nòmber di SEÑOR, Esun ku tin su trono riba e kerubinnan.

⁷Nan a pone e arka di Dios riba un garoshi nobo i a bai kuné for di kas di Abinadab. Usa i Ahio tabata guia e garoshi.

⁸David i tur e israelitanan tabata belenkiá dilanti di SEÑOR. Tabatin kantamentu, muzik di siter, arpa, tamburein, platío i tròmpèt.

⁹Pero ora nan a yega serka Kidon, na e lugá kaminda ta bati trigo, Usa a saka man pa wanta e arka, pasobra e buenan a trompeká.

¹⁰SEÑOR a rabia mashá ku Usa, pasobra el a mishi ku e arka; ei mes den presensia di Dios el a muri.

¹¹David tabata mashá indigná pasobra SEÑOR a baha su rabia riba Usa; p'esei te dia djawe e lugá ei yama Pèrès-Uza, ‘E rabia riba Usa’.

¹²E dia ei David a haña miedu di Dios i el a puntra su mes: ‘Mi ta hasi bon di laga e arka bini serka mi?’

¹³P'esei David no a tuma e arka serka dje den Siudat di David. El a laga hib'é na kas di Obed-Edom, un hòmber di siudat Gat.

¹⁴E arka di Dios a keda tres luna den kas di famia di Obed-Edom. I SEÑOR a bendishoná e famia di Obed-Edom i tur loke e tabatin.