Read Papiamento 1 Krónikanan 14 Bible Online

1 Krónikanan 14 - Papiamento bible

1 Krónikanan 14

¹Rei Hiram di Tiro a manda embahadornan serka David, ku palu di seder, kapdó di piedra i karpinté, pa konstruí un palasio pa David.

²E ora ei David a komprondé ku di bèrdè mes SEÑOR tabata ker e komo rei di Israel i pa kara di su pueblo Israel SEÑOR a hasi su reinado mas famoso.

³Na Herusalèm David a kasa mas be i el a haña mas yu hòmber i muhé.

⁴Ata nòmber di e yu hòmbernan ku a nase na Herusalèm: Shamúa, Shobab, Natan, Salomon,

⁵Yibhar, Elishúa, Elpelèt,

⁶Noga, Nèfèg, Yafia,

⁷Elishama, Beèliada i Elifelèt.

⁸Ora e filisteonan a tende ku nan a konsagrá David rei di henter Israel, nan tur a sali bini ku tur nan trupanan pa kapturá David. Asina David a tende esei, el a sali bai kontra nan.

⁹Ora e filisteonan a bini i a invadí e vaye di Refaim,

¹⁰David a konsultá Dios i a puntr'É: ‘Mi por ataká nan? Bo ta entregá nan den mi man?’ I SEÑOR a kontest'é: ‘Si, ataká nan, pasobra Mi ta entregá nan den bo man.’

¹¹David a bai Baal-Perasim i a derotá e filisteonan aya. E ora ei David a bisa: ‘Dor di mi, Dios a habri paso kontra mi enemigunan manera awa ta habri su kaminda.’ P'esei a yama e lugá ei: Baal-Perasim: SEÑOR ta habri kaminda.

¹²Nan mester a laga asta nan diosnan atras i David a ordená pa kima nan.

¹³E filisteonan a bolbe invadí e vaye.

¹⁴David a bolbe konsultá Dios i Dios a bis'é: ‘No bai derechitu riba nan, pasa den un bog rondó di nan i ataká nan dilanti di e palunan di gòm.

¹⁵Asina bo tende zonido di pia den tòp di e palunan di gòm, sali bai bringa ku nan, pasobra e ora ei Dios a bai bo dilanti pa derotá e ehérsito filisteo.’

¹⁶David a hasi loke Dios a orden'é; henter kaminda for di Guibeon te banda di Guèzèr nan a derotá e filisteonan.

¹⁷David su fama a plama den tur pais i SEÑOR a perkurá pa tur nashon haña miedu di dje.