Read Papiamento 1 Krónikanan 20 Bible Online

1 Krónikanan 20 - Papiamento bible

1 Krónikanan 20

¹Den e temporada ku naturalesa ta kuminsá biba atrobe, den tempu ku reinan tin kustumber di bai guera, Yoab a bai bringa kontra e amonitanan i a destruí nan tera. El a bai Raba i a sitia e siudat. Ma David a keda Herusalèm.

²Dia Yoab a konkistá i destruí Raba, David a kita e korona di oro for di kabes di e dios di amonitanan Milkom.[25] A resultá ku e korona tabata pisa mas ku trinta kilo; den dje tabatin un piedra presioso. Nan a pone e korona akí riba kabes di David. Tambe David a saka mashá hopi kos di balor for di e siudat.

³El a laga hiba e poblashon pafó di siudat i a pone nan traha ku zag,[26] piki i hacha di heru.[27]

⁴Despues tabatin bringamentu ku e filisteonan na Guèzèr. Sibkai di Husha a derotá Sipai, un di e desendientenan di Rafa. E filisteonan a sufri derota.

⁵Atrobe tabatin bringamentu ku e filisteonan; Elhanan, yu di Yair, a derotá Lagmi, ruman di Goliat di Gat, ku tabatin un lansa diki manera un balki.

⁶Despues tabatin otro bringamentu, awor na Gat. Aya tabatin un hòmber mashá altu mes; e tabatin seis dede na kada man i seis tenchi na kada pia: 24 dede na tur. E tambe tabata desendiente di Rafa.

⁷E hòmber akí a desafiá Israel, pero Yonatan, yu di Shima, ruman di David, a dal e mata.

⁸E hendenan akí tabata desendiente di Rafa na Gat; nan a bira víktima di David i su sirbidónan.