Read Papiamento 1 Krónikanan 5 Bible Online

1 Krónikanan 5 - Papiamento bible

1 Krónikanan 5

¹Ruben tabata yu mayó di Israel. Pero el a pèrdè su derechi di yu mayó pasobra el a drumi ku konkubina di su tata. E derechi akí a pasa despues pa e yunan di Jozef, un otro yu di Israel. Tòg Jozef no tabata inskribí komo yu mayó den e registro di famia.

²Huda a bira mas poderoso ku su otro rumannan. Un di su desendientenan a bira rei di Israel, pero Jozef a keda ku e derechi di yu mayó.

³Ruben tabatin kuater yu hòmber: Hanok, Palú, Hèsron i Karmi.

⁴Den nan famia tabatin un tal Yoel; su desendientenan di tata pa yu tabata: Shemaías, Gog, Shimi,

⁵Mikas, Reaías, Baal i Beera.

⁶Beera, kabes di tribu di Ruben, ta esun ku rei Tiglat-Pilesèr di Asiria a deportá.

⁷Ademas den e registro di desendientenan di Ruben, e siguiente hòmbernan ku nan famia tabata inskribí: Yeiel, ku tabata na kabes, despues Zekarías,

⁸i Bèla, yu di Azaz i ñetu di Shema di famia di Yoel. E tribu di Ruben tabata biba na Aroer i den e region parti nort te na Nebo i Baal-Meon.

⁹Pero komo Guilead a bira chikí pa e kantidat grandi di bestia ku nan tabatin, nan a okupá e tera parti ost na rant di e desierto ku ta yega te na riu Eufrat.

¹⁰Tempu di rei Saul e hendenan di Ruben a bringa kontra hagritanan. Ora e hagritanan a kai den nan man, nan a okupá nan tera situá na ost di Guilead.

¹¹E desendientenan di Gad tabata biba banda di tribu di Ruben den region di Bashan te na Salka.

¹²Yoel tabata na kabes. Shafan tabata na di dos lugá. Despues tabata sigui Yanai i Shafat. E famianan akí tabata biba na Bashan.

¹³Ademas tabatin shete otro kabes di famia: Mikael, Meshulam, Sheba, Yorai, Yakan, Zia i Ebèr.

¹⁴Nan tabata desendiente di Abihail, yu hòmber di Huri, i su antepasadonan di yu pa tata tabata: Yaroag, Guilead, Mikael, Yeshishai, Yagdo, Buz.

¹⁵Ahi, yu di Abdiel, ñetu di Guni, tabata kabes di famia.

¹⁶Nan tabata biba den teritorio di Guilead i Bashan, den e regionnan ku tabata pertenesé na e lugánan ei, i den tur e kunukunan di yerba na Sharon te kaminda esakinan tabata kaba.

¹⁷Nan a registrá tur e famianan den tempu ku Yotam tabata rei di Huda i ku Yerobeam tabata rei di Israel.

¹⁸E ehérsito di e tribunan di Ruben, di Gad i di e parti di Manase ku tabata biba na ost di Yordan tabata konsistí di 44.760 hòmber balente. Nan tabata armá ku eskudo, spada i bog.

¹⁹Nan a bringa kontra Yetur, Nafish i Nodab, tribu di hagritanan.

²⁰Nan a pone nan konfiansa den Dios i a resa pidi su yudansa. Dios a skucha nan orashon, yuda nan den bataya di manera ku e hagritanan i nan aliadonan a kai den nan man.

²¹Nan a kita 50.000 kamel, 250.000 karné i 2000 buriku for di e hagritanan. Ademas nan a kohe 100.000 hòmber prezu.

²²Hopi enemigu a muri pasobra SEÑOR a batayá na banda di e israelitanan. Nan a keda biba den e region ei te ora nan mes mester a bai den eksilio komo prezu.

²³E miembronan di e mitar tribu di Manase tabata biba den region di Bashan te na Baal-Hermon, Senir i te na e serunan di Hermon. Nan tabata bira dia pa dia mas hopi.

²⁴E kabesnan di famia tabata: Efèr, Yishi, Eliel, Asriel, Yirmeya, Hodavías i Yagdiel, hòmbernan balente, kabesnan di famia respetá.

²⁵Pero nan a bira infiel na Dios di nan antepasadonan i a bai sirbi diosnan di e pueblonan ku Dios a kore kuné pa e israelitanan.

²⁶P'esei Dios a laga rei Pul di Asiria, konosí komo Tiglat-Pilesèr, bai ku e tribunan di Ruben, di Gad i ku mitar di Manase i hiba nan Helag, Habor, Hara i na riu Gozan. Aya nan ta biba te dia djawe.