Read Papiamento 2 Krónikanan 15 Bible Online

2 Krónikanan 15 - Papiamento bible

2 Krónikanan 15

¹Spiritu di SEÑOR a baha riba Azarías, yu hòmber di Oded.

²El a bai kontra ku Asa i a bis'é: ‘Skucha mi, Asa, henter Huda i Benhamin! SEÑOR ta ku boso, miéntras boso ta kunÉ. Si boso busk'É, E ta laga boso hañ'É, pero si boso bira lomba p'E, E tambe ta bira lomba pa boso.

³Pa basta tempu Israel a biba sin e Dios berdadero, tampoko nan no tabatin saserdotenan pa instruí nan; nan tabata biba sin tene kuenta ku lei.

⁴Niun hende no por a biaha trankil. Unda ku bo a bai, den tur region tabatin desòrdu. Tribunan tabatin konflikto ku otro, siudatnan tabatin konflikto ku otro. Dios a sembra desunion i intrankilidat tur kaminda. Pero ora kos tabata bai malu, nan tabata bolbe serka SEÑOR, Dios di Israel. Nan tabata busk'É i E tabata laga nan hañ'É.

⁷Tene kurashi, no pèrdè ánimo, boso esfuerso lo ta rekompensá.’

⁸Asina Asa a tende e palabranan ei, el a haña kurashi i a eliminá e imágennan di dios falsu, no solamente den henter region di Huda i Benhamin, pero tambe den e siudatnan ku el a invadí den serunan di Efraim. El a renobá e altá di SEÑOR ku tabata pará dilanti di portal di tèmpel di SEÑOR.

⁹E ora ei el a laga yama henter Huda i Benhamin pa bini Herusalèm, tambe tur hende den e regionnan di tribu di Efraim, Manase i Simeon ku a bin biba na Huda. Hopi di nan a bandoná Israel i a djòin Asa ora nan a ripará ku SEÑOR, su Dios, tabata kuné.

¹⁰E reunion akí a tuma lugá na Herusalèm den e di diessinku aña di reinado di Asa den e di tres luna di aña.

¹¹For di e botin ku nan a poderá di dje, nan a tuma 700 baka i 7000 karné i kabritu i a ofresé nan na SEÑOR.

¹²Nan a renobá e aliansa ku Dios a sera ku nan antepasadonan. Nan a primintí bou di huramentu ku nan lo busk'É di henter nan kurason i ku henter nan alma

¹³i nan lo mata tur hende ku nenga di obedesé boluntat di SEÑOR, Dios di Israel, sea ku e hende ta yòn òf bieu, hòmber òf muhé.

¹⁴Tur esaki nan a primintí SEÑOR bou di gritu di alegria, tokamentu di tròmpèt i di kachu.

¹⁵Tur hende na Huda tabata kontentu ku e huramentu ku nan a hasi kompletamente konvensí. Nan a buska SEÑOR di henter nan kurason i El a laga nan hañ'É. SEÑOR a perkurá pa pas reina na tur nan fronteranan.

¹⁶Rei Asa asta a kita e puesto di reina mama for di su wela Maaka, pasobra Maaka a laga traha un imágen mashá repugnante di Ashera. Asa a kap e imágen ei na pida pida, a garn'é i a kim'é den Vaye di Kidron.

¹⁷Ounke e no a kita e seritunan di sakrifisio, tòg henter su bida el a dediká su mes di henter su kurason na SEÑOR.

¹⁸Regalonan ku su tata i e mes a konsagrá na SEÑOR el a hiba tèmpel: plata, oro i ophetonan di uso.

¹⁹Te ku di 35 aña di reinado di Asa e pais tabata liber di guera.