Read Papiamento 2 Krónikanan 21 Bible Online

2 Krónikanan 21 - Papiamento bible

2 Krónikanan 21

¹Yoshafat a bai sosegá serka su antepasadonan i nan a der'é serka nan den Siudat di David. Su yu Yoram a siguié komo rei.

²Yoram tabatin seis ruman hòmber mas: Azarías, Yehiel, Zekarías, Azariahu, Mikael i Shefatías. Tur tabata yu di rei Yoshafat di Huda.[11]

³Nan tata a duna nan mashá hopi regalo, oro, plata i otro opheto di balor i a enkargá nan ku e siudatnan reforsá. Pero el a nombra Yoram komo su susesor pasobra e tabata esun mayó.

⁴Ora Yoram a sigui su tata komo rei i su reino tabata firme, el a mata tur su ruman hòmbernan i tambe algun funshonario altu.

⁵Yoram tabatin 32 aña dia el a bira rei; el a goberná ocho aña na Herusalèm.

⁶El a sigui ehèmpel di reinan di Israel, spesialmente ehèmpel di kas real di Ahab, komo ku e tabata kasá ku un yu di Ahab. I el a hasi loke ta malu den bista di SEÑOR.

⁷Pero pa motibu di e aliansa ku SEÑOR a sera ku David, E no ker a destruí e kas real di David, pasobra El a primintí David ku semper lo E tene su rekuerdo bibu dor di laga un di su desendientenan siguié riba trono.

⁸Durante gobernashon di Yoram e edomitanan a lanta kontra dominio di Huda i a nombra nan mes rei.

⁹E ora ei Yoram a bai Sair ku tur su garoshinan di guera. Den anochi el a ataká i derotá e edomitanan ku tabata rondoná e i su komandantenan di garoshi.

¹⁰Tòg Edom a logra bira independiente di Huda, i a keda liber te dia djawe. Den e mesun tempu Libna tambe a lanta kontra Yoram i a bira independiente, pasobra Yoram a bandoná SEÑOR, Dios di su antepasadonan.

¹¹Ademas el a traha seritu di sakrifisio den serunan di Huda, i a pone e habitantenan di Herusalèm kai den tentashon pa sirbi dios falsu i el a hinka Huda den mal kaminda.

¹²El a haña un karta di profeta Elías. Den e karta tabata pará: ‘Asina SEÑOR, Dios di bo antepasado David, ta bisa: “Bo no a sigui ehèmpel di bo tata, rei Yoshafat, ni di bo tawela, rei Asa.

¹³Al kontrario, bo a sigui ehèmpel di e reinan di Israel i a pone Huda i e habitantenan di Herusalèm sirbi dios falsu meskos ku Ahab i su susesornan a pone Israel hasi. Asta bo a mata bo mes ruman hòmbernan ku tabata mihó ku bo.

¹⁴Ta p'esei SEÑOR lo laga un desgrasia grandi kai riba bo pueblo, bo yunan, bo kasánan i riba tur loke bo tin.

¹⁵Bo mes lo haña un malesa na bo tripa, un malesa króniko, te ku despues di tempu bo tripanan ta sali pafó.” ’

¹⁶SEÑOR a instigá e filisteonan i e arabirnan ku tabata biba banda di e hendenan di Etiopia,

¹⁷pa nan bringa kontra Yoram. Nan a ataká Huda i a invadí e pais. Nan a bai no solamente ku loke tabatin den palasio real, pero tambe ku e kasánan i e yu hòmbernan di Yoram, ku eksepshon di Ahazías, esun di mas chikí.

¹⁸Despues di tur e kosnan akí, SEÑOR a lag'é haña un malesa di tripa ku no por a kura.

¹⁹Mas o ménos dos aña despues e malesa akí a kousa ku su tripa a sali pafó i el a muri ku dolónan teribel. E pueblo no a sende un kandela na su honor, manera nan a hasi pa su antepasadonan.

²⁰Yoram a bira rei dia e tabatin 32 aña. El a goberná ocho aña na Herusalèm. No a duel ningun hende ku el a muri. Nan a der'é na Siudat di David, pero no den e grafnan real.