Read Papiamento 2 Krónikanan 22 Bible Online

2 Krónikanan 22 - Papiamento bible

2 Krónikanan 22

¹Habitantenan di Herusalèm a hasi Ahazías, yu hòmber di mas chikí di Yoram, su susesor, pasobra e trupa di bandidu ku a bini ku e arabirnan ku a ataká kampamentu di ehérsito israelita a mata e yu hòmbernan mas grandi. Asina Ahazías a sigui su tata Yoram komo rei di Huda.

²Ahazías tabatin bintidos[12] aña dia el a bira rei. El a goberná un aña so na Herusalèm. Su mama tabata yama Atalia; e tabata ñetu di Omri, rei di Israel.

³Ahazías tambe a sigui den mes kaminda ku Ahab i su kas real, pasobra su mama ku su mal konsehonan a pon'é kometé echonan malbado.

⁴El a hasi loke ta malu den bista di SEÑOR, meskos ku e desendientenan di Ahab; despues di morto di su tata nan a bira su konsehero, loke a resultá den su desgrasia.

⁵Riba nan konseho Ahazías a sera kabes ku Yoram, yu di Ahab, rei di Israel, pa bai bringa na Ramot-Guilead kontra Hazael, rei di Aram. Ma e arameonan a heridá Yoram.

⁶El a bai Yizreel bèk pa kura di heridanan ku el a haña na Ramot den bataya kontra Hazael, rei di Aram. Durante su enfermedat na Yizreel el a haña bishita di Ahazías, yu di Yoram, rei di Huda.

⁷Pero Dios a usa e bishita na Yoram akí pa kaba ku Ahazías. Pasobra ora el a yega aya e ku Yoram a bai serka Yehu, ku Dios a skohe pa kaba ku kas real di Ahab. Yehu tabata yu di Nimshi.

⁸Ora Yehu tabata ehekutá e sentensia akí, un grupo di lider di Huda i un par di primu di Ahazías, ku a kompañ'é dia el a bai bishita Yoram, tabata e proménan ku a kai den su man.

⁹Ora Yehu a kaba di mata nan e ker a haña Ahazías tambe. Nan a kohe Ahazías prezu na Samaria kaminda el a bai skonde i a hib'é dilanti Yehu. Nan a mat'é, pero nan a dera e sí pasobra nan a bisa: ‘E ta ñetu di Yoshafat ku a sirbi SEÑOR di henter su kurason.’ Niun hende di famia di Ahazías no tabata kapas di tuma e gobièrnu riba dje.

¹⁰Ora Atalia, mama di Ahazías, a mira ku su yu a muri, el a tuma medida i a laga mata henter famia real di Huda.

¹¹Yehoshabeat, un prinsesa, ketuketu a kohe Yoash, yu di Ahazías, for di e grupo di prínsipenan ku nan ker a mata, bai kuné. El a skond'é pa Atalia, huntu ku su mama di lechi, den e kamber kaminda tabata warda paña di kama. Asina Yoash a skapa for di morto. Yehoshabeat tabata yu di rei Yoram i ruman di Ahazías. E tabata kasá ku saserdote Yoyada.

¹²Seis aña largu Yoash a keda skondí serka nan den tèmpel di SEÑOR. Tur e tempu ei Atalia tabata goberná e pais.