Read Papiamento 2 Krónikanan 29 Bible Online

2 Krónikanan 29 - Papiamento bible

2 Krónikanan 29

¹Ezekías tabatin 25 aña dia el a bira rei i el a goberná 29 aña na Herusalèm. Su mama tabata Abías, yu di Zekarías.

²E tabata hasi loke ta bon den bista di SEÑOR, den tur kos el a sigui ehèmpel di su antepasado David.

³Ya den e promé aña, den e promé luna, el a bolbe habri tèmpel i drecha e portanan.

⁴El a laga e saserdotenan i e levitanan bini huntu riba Plenchi Ost

⁵i bisa: ‘Levitanan, skucha mi! Purifiká boso i purifiká tèmpel di SEÑOR, Dios di boso antepasadonan; saka tur loke ta impuru for di santuario.

⁶Nos antepasadonan a bira infiel na SEÑOR, nos Dios, nan a hasi loke ta malu den su bista i a bira lomba p'E i pa su tèmpel.

⁷Asta nan a sera e portanan di portal di tèmpel i paga e lampinan; nan no a kima sensia den santuario i no a ofresé sakrifisio di kandela na Dios di Israel.

⁸Ta p'esei SEÑOR a rabia ku Huda i Herusalèm. El a hasi di nan un kos ku ta yena hende ku miedu i asko, manera boso por mira ku boso mes wowo.

⁹Pa e motibu ei, nos antepasadonan a muri den guera i nan a kohe nos kasánan i yunan prezu bai ku nan.

¹⁰Awor ta mi intenshon di sera un aliansa ku SEÑOR, Dios di Israel, pa por kita su ira for di nos.

¹¹Mi yunan, no sigui deskuidá boso deber, pasobra ta boso SEÑOR a skohe pa sirbiÉ den su tèmpel i ofresé sakrifisio n'E.’

¹²E siguiente levitanan a ofresé nan mes: di famia Kehat Mahat, yu di Amasai, i Yoel, yu di Azarías; di famia Merari Kish, yu di Abdi, i Azarías, yu di Yehalelel; di famia Guershon Yoag, yu di Zima, i Eden, yu di Yoag;

¹³di famia Elisafan Shimri i Yeiel; di famia Asaf, Zekarías i Matanías;

¹⁴di famia di Heman Yehiel i Shimi; di famia di Yedutun Shemaías i Uziel.

¹⁵Nan a yama nan koleganan huntu, a purifiká nan mes i despues nan a bai purifiká tèmpel, manera rei a ordená di akuerdo ku mandamentu di SEÑOR.

¹⁶E saserdotenan a drenta tèmpel i a saka tur kos impuru ku nan a haña, trese riba e plenchi dilanti. Djei e levitanan a saka nan for di siudat i hiba nan riu Kidron.

¹⁷Riba e promé dia di e promé luna nan a kuminsá purifiká tèmpel; despues di ocho dia nan tabata na e portal i pa tèmpel mes nan tabatin mester di ocho dia mas. Dia diesseis nan tabata kla.

¹⁸E dia ei, nan a presentá dilanti di rei Ezekías i bisa: ‘Tèmpel di SEÑOR ta kompletamente purifiká. Tambe e altá kaminda tin ku ofresé sakrifisio di kandela i e mesa kaminda mester pone pan konsagrá i tur loke ta pertenesé na nan ta purifiká.

¹⁹Tur e ophetonan ku rei Ahas a profaná durante tur e añanan ku e tabata infiel na SEÑOR, nos a bolbe purifiká nan pa sirbishi sagrado. Nan ta poné kla dilanti altá di SEÑOR.’

²⁰Su manisé mainta rei Ezekías a yama henter gobièrnu di siudat huntu i el a bai tèmpel ku nan.

²¹Nan a bai ku shete toro, shete chubat'i karné i shete karné pa sakrifisio di kandela i shete chubat'i kabritu pa e sakrifisio pa pordon di piká di kas real, di santuario i di pueblo di Huda. El a ordená e saserdotenan, desendiente di Aaron, pa ofresé nan riba altá.

²²Tras di otro nan a mata e bakanan, e chubat'i karnénan i e karnénan. E saserdotenan a tuma e sanger i sprengu e kontra altá.

²³Na final nan a trese e chubatunan dilanti di rei i e israelitanan presente; rei i e israelitanan a pone man riba nan.

²⁴E saserdotenan a mata e chubatunan i a ofresé e sanger riba altá komo sakrifisio pa pordon di piká di henter Israel, pasobra rei a ordená pa esaki sirbi komo sakrifisio di kandela komo sakrifisio pa pordon di piká di henter Israel.

²⁵Tambe el a pone e levitanan para ku simbal, arpa i siter na tèmpel. Asina David a preskribí di akuerdo ku loke SEÑOR a ordená pa medio di su profetanan, e vidente di rei ku yama Gad i profeta Natan.

²⁶Ora e levitanan tabata pará kla ku e instrumèntnan ku David a yega di preskribí i e saserdotenan tabata pará ku e tròmpètnan,

²⁷rei a ordená pa ofresé e sakrifisio di kandela riba altá. Ora e saserdotenan a kuminsá ku e sakrifisio, nan a entoná un kantika na SEÑOR, kompañá pa e instrumèntnan ku rei David a preskribí Israel.

²⁸Tur presente a bùig den adorashon. Mientrastantu e levitanan tabata kanta i tabata toka tròmpèt te ora a kaba di hasi e ofrenda.

²⁹Despues ku e sirbishi di ofrenda a pasa kompletamente, rei i tur presente a hinka rudia den adorashon.

³⁰Despues rei i gobièrnu di siudat a ordená e levitanan pa alabá SEÑOR ku e palabranan di David i di vidente Asaf. Nan a kanta kontentu i bùig den adorashon.

³¹E ora ei Ezekías a dirigí palabra na pueblo: ‘Boso no a bini serka SEÑOR ku man bashí. Yega serka i trese boso sakrifisio di gradisimentu i otro sakrifisio dilanti di tèmpel di SEÑOR.’ E ora ei e pueblo presente a ofresé nan sakrifisionan, ademas ken ku tabata ke a ofresé sakrifisio di kandela.

³²E kantidat di sakrifisio di kandela ku nan a ofresé na SEÑOR tabata: setenta baka, shen chubat'i karné i dosshen karné.

³³E sobrá sakrifisionan tabata konsistí di seisshen baka i tres mil karné.

³⁴Tabatin muchu poko saserdote presente pa soya tur e bestianan destiná pa sakrifisio di kandela. P'esei e levitanan a yuda nan kaba e trabou. Mientrastantu mas saserdote por a prepará pa nan tarea sagrado. Pasobra e levitanan a tuma nan purifikashon mas na serio ku e saserdotenan.

³⁵Ademas, riba e dia ei e kantidat di sakrifisio di kandela tabata mashá grandi i aparte di esei e saserdotenan mester a ofresé e sebu di e sakrifisio di pas i mester a basha biña komo ofrenda huntu ku e sakrifisio di kandela. Asina a restablesé e sirbishi di sakrifisio den tèmpel di SEÑOR.

³⁶Ezekías i henter pueblo a alegrá nan pa tur loke SEÑOR a hasi mas lihé ku nan a spera.