Read Papiamento 2 Krónikanan 32 Bible Online

2 Krónikanan 32 - Papiamento bible

2 Krónikanan 32

¹Despues di tur e akontesimentunan akí, kaminda Ezekías a mustra SEÑOR kon fiel e ta, rei Sanherib di Asiria a ranka sali; el a konkistá Huda i a sitia e siudatnan reforsá. El a ordená su trupanan kibra e murayanan traha buraku ku intenshon di invadí e siudat ku violensia.

²Ora Ezekías a ripará ku Sanherib tabata aserká Herusalèm ku intenshon di atak'é,

³el a disidí di dèmpel tur bròn di awa pafó di siudat, despues di a konsultá ku e funshonarionan altu i e òfisirnan. Nan a primintié di yud'é

⁴i a trese un multitut di hende huntu ku no solamente a dèmpel e brònnan pero tambe nan a dèmpel e roi ku tabata kore riba teritorio di Herusalèm. Nan a bisa otro: ‘Aki sigur e reinan di Asiria no ta haña awa!’

⁵Ezekías i tur hende a traha mashá duru mes pa sera tur buraku den muraya di siudat i a hasi e torennan di vigilansia mas altu. Tambe el a traha un di dos muraya rondó di e muraya di siudat. Ademas el a reforsá e terasa di Milo di Siudat di David i el a traha gran kantidat di lansa i eskudo.

⁶Na kabes di e siudadanonan el a pone algun komandante. Despues el a yama tur hende huntu riba e plenchi na porta di siudat. Pa kurashá nan el a bisa lo siguiente:

⁷‘Sea disididu i balente, no tene miedu, no laga rei di Asiria hinka miedu den boso ku su ehérsito grandi, pasobra tin un poder muchu mas grandi na nos banda.

⁸Rei di Asiria ta konfia den poder di mundu, ma nos ta konfia den SEÑOR, nos Dios, ku ta yuda nos i ta bringa e guera pa nos.’ Ku e palabranan akí rei Ezekías di Huda a kurashá e pueblo.

⁹Despues di poko tempu rei Sanherib di Asiria ku tabata ainda ku henter su ehérsito dilanti di e siudat Lakish, a manda su mensaheronan serka rei Ezekías di Huda i e hudeonan ku tabata na Herusalèm ku e siguiente mensahe:

¹⁰‘Rei Sanherib di Asiria ta laga puntra: “Den ken boso ta konfia antó ku boso a laga nos sera boso den Herusalèm?”

¹¹Ezekías ta bisa bèrdè: “SEÑOR, nos Dios, lo libra nos for di man di rei di Asiria.” Pero ta gaña e ta gaña boso pa boso muri di hamber i set.

¹²N' ta Ezekías mes a laga kita e seritunan di sakrifisio i e altánan di boso Dios? N' t'e a ordená e pueblo di Huda i Herusalèm pa nan bùig den adorashon solamente dilanti di e altá na Herusalèm i kima sensia riba e altá ei so?

¹³Boso no sa kiko ami i mi antepasadonan a hasi ku e pueblonan di e otro paisnan? Akaso e diosnan di e pueblonan ei por a libra nan pais for di mi man?

¹⁴Kua di e diosnan di e pueblonan ei ku mi antepasadonan a destruí nan pais por a salba nan for di mi man? Di kon boso ta pensa ku boso Dios por salba boso?

¹⁵No laga Ezekías gaña boso, no lag'é bruha boso, no ker'é! Hamas niun dios, di kua pais òf reino ku ta, por a libra su pueblo for di mi man òf for di man di mi antepasadonan. Kòrda boso Dios!’

¹⁶Den e tono akí e mensaheronan a sigui bisa diferente kos mas di SEÑOR Dios i di su sirbidó Ezekías.

¹⁷Tambe Sanherib a skibi un karta, hasiendo bofon di SEÑOR, Dios di Israel. Den e karta el a bisa: ‘Niun dios, no ta importá di kua pueblo, por a libra su pueblo for di mi man i e dios di Ezekías tampoko lo no por libra su pueblo.’

¹⁸Pa hinka miedu den pueblo i asina invadí e siudat mas fásil, e mensaheronan a grita duru na hudeo pa e pueblo pará riba muraya di Herusalèm tende.

¹⁹Nan a papia di Dios di Herusalèm meskos ku di e diosnan di otro pueblonan di mundu, ku simplemente man di hende a traha.

²⁰Pero rei Ezekías i profeta Isaías, yu di Amoz, a resa pidi Dios yudansa.

²¹E ora ei SEÑOR a manda un angel ku a destruí henter e ehérsito di rei di Asiria ku su komandantenan i òfisirnan. Yen di bèrgwensa rei di Asiria a bai su pais bèk. Un dia ora el a drenta tèmpel di su dios, su mes yu hòmbernan a hink'é mata.

²²Asina SEÑOR a libra rei Ezekías i e habitantenan di Herusalèm for di gara di rei Sanherib di Asiria i for di gara di tur otro enemigu; El a laga pas reina[15] na tur nan fronteranan.

²³Hopi hende tabata bini Herusalèm pa hasi ofrenda na SEÑOR i ofresé rei Ezekías di Huda regalo di balor. For di e tempu ei rei Ezekías tabata bon mirá serka tur pueblo.

²⁴Den e tempu ei Ezekías a bira malu pa muri; pero el a resa na SEÑOR i SEÑOR a kontest'é ku un señal milagroso.

²⁵Ezekías no a mustra su gratitut pa e bondat ku SEÑOR a hasi p'e. Al kontrario, el a bira orguyoso, p'esei SEÑOR a bira rabia kuné, ku Huda i ku Herusalèm.

²⁶E ora ei Ezekías a pone orguyo un banda; e i e habitantenan di Herusalèm a humiliá nan mes di manera ku SEÑOR no a laga su ira baha riba nan den tempu di Ezekías.

²⁷Ezekías tabata mashá riku i honrá tur kaminda.

²⁸El a traha kamber di tesoro pa su oro, plata, su piedranan presioso, speserei, su eskudonan i otro kosnan di balor. Ademas el a traha depósito pa trigo, biña i zeta di oleifi; stal pa tur sorto di bestia di kria, ku e tabata tin na gran kantidat.

²⁹El a reforsá su stalnan i a buska pa haña tou grandi di karné i hopi otro bestia di krio; den un palabra, SEÑOR a kolm'é ku biennan na abundansia.

³⁰Ta e Ezekías akí a dèmpel boka di bròn di Guihon ku tabata riba tera i a guia e awa pa e pasa bou di tera den direkshon wèst bai Siudat di David. E tabata eksitoso den tur kos ku el a hasi.

³¹Asta ora e lidernan di Babilonia a manda mensahero pa haña informashon tokante e señal milagroso ku a sosodé den e pais, Dios a lag'é hasi loke e tabata ke, djis pa pon'é na prueba i haña sa ken e ta di bèrdè.

³²Sobrá historia di Ezekías i su echonan piadoso ta skibí den vishon di profeta Isaías, yu di Amoz, i den e buki ‘Reinan di Huda i Israel’.

³³Ezekías a bai sosegá i a der'é den e grafnan di famia real di David, situá mas ariba. Henter pueblo di Huda i di Herusalèm a dun'é último tributo. Su yu Manase a siguié komo rei.