Read Papiamento 2 Krónikanan 9 Bible Online

2 Krónikanan 9 - Papiamento bible

2 Krónikanan 9

¹Reina di Sheba a tende di e fama ku Salomon a haña. El a bai Herusalèm pa hasi Salomon pregunta difísil pa asina pon'é na prueba. E reina a yega ku un grupo grandi di hende ku tabata kompañ'é, ku kamel kargá ku perfume, mashá hopi oro i piedra presioso. Ora el a yega serka Salomon, el a bis'é tur loke e tabatin riba su kurason.

²Salomon tabatin kontesta pa tur su preguntanan. Niun pregunta no tabata muchu difísil pa e kontestá.

³Ora reina di Sheba a weta sabiduria di Salomon, e kas ku el a traha,

⁴e kumindanan na su mesa, e funshonarionan di korte ku tabata kome huntu kuné, e sirbidónan ku tabata kana rònt, e pañanan ku nan tabatin bistí, e sirbidónan di biña, e pañanan ku nan tabatin bistí i e proseshon ora Salomon tabata bai tèmpel di SEÑOR, el a pèrdè abla.

⁵Despues el a bisa rei: ‘Ta bèrdat antó, loke mi a tende na mi tera di bo logronan i bo sabiduria.

⁶Pero mi no por a kere, ku no ta te ora mi a yega i mira ku mi mes wowo. Echo ta ku nan no a konta mi ni mitar di bo sabiduria grandi; bo a surpasá tur loke mi a tende.

⁷Felis bo hendenan[6] i felis e funshonarionan akí ku tur ora ta huntu ku bo i ta tende bo sabiduria!

⁸Alabá sea SEÑOR, bo Dios; bo a kai asina tantu na su agrado, ku El a pone bo riba su trono pa bo ta rei den su nòmber! Pasobra bo Dios a stima Israel asina tantu ku E ke lag'é para firme pa semper, El a hasi bo nan rei pa bo mantené derecho i hustisia.’

⁹E reina a duna Salomon 3600 kilo di oro, gran kantidat di perfume i piedra presioso. Nunka tabatin perfume dje kalidat ku reina di Sheba a regalá rei Salomon.

¹⁰Ademas e sirbidónan di Hiram i esnan di Salomon, ku a trese oro for di Ofir, tambe a trese palu di sándalo i piedra presioso.

¹¹Di e palu di sándalo rei a laga traha trapi pa kas di SEÑOR i pa palasio real, tambe siter i arpa pa músikonan. Nunka promé nan no a mira algu asina na Huda.

¹²Rei Salomon a kumpli ku tur deseo di reina di Sheba, el a duna e reina mas ku e reina a trese p'e. Despues e reina a kohe kaminda pa regresá su tera, kompañá pa e hendenan den su servisio.

¹³E oro ku rei Salomon tabata risibí pa aña tabata pisa 20.000 kilo,

¹⁴sin konta loke e tabata kobra na impuesto di e komersiantenan i e negosiantenan. Fuera di esei tur e reinan di Arabia i e gobernadornan di e pais tabata trese oro i plata pa Salomon.

¹⁵Rei Salomon a traha 200 eskudo grandi di oro batí. Pa kada unu el a usa seis kilo di oro.

¹⁶Tambe el a traha 300 eskudo mas chikitu di oro batí. Pa kada un el a usa tres kilo di oro. Despues el a pone nan den e palasio ‘Boske di Libanon’.

¹⁷Tambe rei a traha un trono grandi furá ku ivor i oro puru.

¹⁸E trono tabatin seis tret, un taburèt di oro pegá n'e, i un man na kada banda. Banda di e mannan tabatin dos leon pará;

¹⁹tabatin diesdos leon pará riba e seis tretnan, un na kada banda di un tret. Den ningun otro reino nan no a yega di traha algu asina.

²⁰Tur e bekernan di rei Salomon tabata di oro, tur loke tabata usa na mesa den palasio ‘Boske di Libanon’ tabata di oro fini. Tempu di Salomon plata no tabatin balor.

²¹Rei tabatin barkunan komersial. Tripulante di e barkunan tabata sirbidó di Hiram. Un be den tres aña nan tabata drenta, kargá ku oro, plata, ivor, makaku i pòwis.

²²Den rikesa i sabiduria rei Salomon a surpasá tur rei na mundu.

²³Tur rei na mundu tabata deseá di mira Salomon pa tende e sabiduria ku Dios a dun'é.

²⁴Kada un di nan tabata trese kos di oro i plata, paña, arma, perfume, kabai i mula. Esei tabata sosodé aña aden aña afó.

²⁵Tambe Salomon tabatin 4000 lugá kaminda e por a pone kabai i garoshi di guera. E tabatin un kabayeria di 12.000 hende. El a stashoná un parti na e siudatnan ku el a traha pa e motibu ei i un otro parti a keda Herusalèm na su mes disposishon.

²⁶Salomon tabata manda riba tur e reinan for di riu Eufrat te na pais di filisteonan i te na frontera ku Egipto.

²⁷Rei a sòru pa na Herusalèm tabatin plata manera tabatin piedra i ku tabatin palu di seder manera figo shimaron ta krese den Sabana di Shefela.

²⁸E kabainan destiná pa Salomon tabata bini for di Egipto i for di tur otro pais.

²⁹Mas detaye tokante Salomon, for di antaño te mas resien ta skibí, den Historia di profeta Natan, den Profesia di Ahías di Silo i den e Vishonnan di vidente Ido tokante Yerobeam, yu hòmber di Nebat.

³⁰For di Herusalèm, Salomon a goberná henter Israel durante kuarenta aña.

³¹Dia Salomon a bai sosegá serka su antepasadonan, a der'é na siudat di su tata David. Su yu Rehabeam a siguié komo rei.