Read Papiamento Esdras 10 Bible Online

Esdras 10 - Papiamento bible

Esdras 10

¹Miéntras Esdras na rudia dilanti di tèmpel, yorando tabata resa i rekonosé nan falta, un multitut mashá grandi di israelita, hòmber, muhé i mucha, a basha bini serka dje. Nan tambe a grita yora.

²E ora ei Shekanías, yu di Yehiel i desendiente di Elam, a bisa Esdras: ‘Nos a bira infiel na nos Dios, pasobra nos a kasa ku muhé pagano for di e pueblonan di e pais akí. Sinembargo ainda tin speransa pa Israel.

³Laga nos primintí nos Dios solemnemente ku nos lo manda tur e muhénan ei i tur nan yunan bai. Nos ke sigui bo konseho i konseho di esnan ku ta tembla pa mandamentu di Dios. Mester kumpli ku lei.

⁴Lanta, pasobra e asuntu akí ta den bo man. Man na obra; nos ta pará bo tras.’

⁵E ora ei Esdras a lanta i laga e hefenan di saserdote, di levita i di henter Israel hura ku nan lo kumpli ku loke Shekanías a proponé.

⁶Despues Esdras a bandoná e plenchi di tèmpel i bai den kamber di Yohanan, yu di Elyashib. Aya el a pasa nochi.[10] E no a kome ni bebe nada pasobra e tabatin duele pa e infieldat di esnan ku a bolbe for di den eksilio.

⁷Despues nan a manda yama den Huda i Herusalèm tur esnan ku a bolbe for di den eksilio pa nan reuní na Herusalèm bou di siguiente menasa:

⁸Si un hende no presentá denter di tres dia, nan lo pone beslag riba su propiedat i nan lo sak'é for di komunidat di esnan ku a bolbe for di den eksilio, segun desishon di e hefenan i e lidernan.

⁹Tur e hòmbernan di Huda i Benhamin a reuní na Herusalèm den tres dia, esta riba e di binti dia di e di nuebe luna. Henter pueblo tabata sintá riba plenchi di tèmpel. Nan tabata tembla, no solamente pasobra tabata trata di un kos serio, pero tambe pa motibu di un yobida fuerte.

¹⁰Saserdote Esdras a lanta i bisa nan: ‘Boso a bira infiel na SEÑOR, pasobra boso a kasa ku muhé ku no ta hudiu. Ta p'esei boso a hasi Israel su falta ainda mas grandi.

¹¹Rekonosé boso falta antó dilanti di SEÑOR, Dios di boso antepasadonan. Hasi loke E ke: apartá boso for di e pueblonan pagano ei i for di e muhénan ku no ta hudiu.’

¹²E ora ei henter e komunidat a kontestá na bos altu: ‘Sí, bo tin rason, ta nos deber di hasi loke bo bisa.

¹³Pero nos ta hopi i ta tempu di yobida, asina ta ku nos no por keda para akifó; ademas, e asuntu akí no ta algu ku bo por regla den un òf dos dia, komo ta hopi di nos ta envolví.

¹⁴Laga nos hefenan representá henter e komunidat i tuma riba nan pa atendé e asuntu akí. Tur siudadano ku ta kasá ku un muhé ku no ta hudiu, mester presentá dilanti di e lidernan akí riba oranan stipulá, huntu ku e lidernan i e huesnan di nan siudat. Ora nos kaba di atendé e asuntu akí, furia di nos Dios lo kita for di nos.’

¹⁵Solamente Yonatan, yu di Asael, i Yagzeías, yu di Tikwa, ku apoyo di Meshulam i e levita Shabtai tabata kontra e proposishon akí. E otro hudiunan ku a bini bèk for di den eksilio a bai di akuerdo. E ora ei saserdote Esdras a menshoná nòmber di algun kabes di famia ku el a skohe[11] pa atendé e asuntu akí. Riba promé dia di e di dies luna, e promé seshon a tuma lugá i nan a kuminsá e investigashon.

¹⁷Riba promé dia di e promé luna, nan a terminá ku tur e kasonan di hòmber ku a kasa ku muhé ku no tabata hudiu.

¹⁸Aki ta sigui lista di e hòmbernan ku a resultá di ta kasá ku muhénan ku no tabata hudiu. Di e saserdotenan: di famia di Yeshua, yu di Yosadak, i di famia di su rumannan: Maasea, Eliezer, Yarib i Guedalías.

¹⁹Nan a primintí solemnemente ku nan lo manda nan kasánan bai. Nan a rekonosé di ta kulpabel i a ofresé un chubat'i karné komo sakrifisio pa nan falta.

²⁰Hanani i Zebadías di famia di Imer;

²¹Maasea, Elías, Shemaías, Yehiel i Uzías di famia di Harim;

²²Elyoenai, Maasea, Yishmael, Netanel, Yozabad i Elasa di famia di Pashur.

²³Di e levitanan: Yozabad, Shimi, Kelaya, esta Kelita, Petaías, Yehuda i Eliezer.

²⁴Di e kantornan: Elyashib. Di e guardianan: Shalum, Tèlèm i Uri.

²⁵Di e otro israelitanan: di e yu hòmbernan di Parosh: Ramia, Yizías, Malkías, Miamin, Elazar, Malkías i Benayahu.

²⁶Di famia di Elam: Matanías, Zekarías, Yehiel, Abdi, Yeremot i Elías.

²⁷Di famia di Zatu: Elyoenai, Elyashib, Matanías, Yeremot, Zabad i Aziza.

²⁸Di famia di Bebai: Yohanan, Hananías, Zabai i Atlai.

²⁹Di famia di Bani: Meshulam, Maluk, Adaías, Yashub, Sheal i Yeramot.

³⁰Di famia di Pahat-Moab: Adna i Kelal, Benayahu, Maasea, Matanías, Besalel, Binuí i Manase.

³¹Di famia di Harim: Eliezer, Yishías, Malkías, Shemaías i Simeon,

³²Benhamin, Maluk i Shemarías.

³³Di famia di Hashum: Matnai, Matata, Zabad, Elifelèt, Yeremai, Manase i Shimi.

³⁴Di famia di Bani: Maadai, Amram, Uel,

³⁵Benayahu, Bedías, Keluhu,

³⁶Wania, Meremot, Elyashib,

³⁷Matanías, Matnai, Yaaso,

³⁸Bani, Binuí, Shimi,

³⁹Shèlèmías, Natan, Adaías,

⁴⁰Maknadbai, Shashai, Sharai,

⁴¹Azarel, Shèlèmías, Shemarías,

⁴²Shalum, Amarías i Yosef.

⁴³Di famia di Nebo: Yeiel, Matitías, Zabad, Zebina, Yadai, Yoel i Benayahu.

⁴⁴Nan tur akí a kasa ku muhé ku no tabata hudiu; den nan tabatin muhé ku yu.