Read Papiamento Esdras 5 Bible Online

Esdras 5 - Papiamento bible

Esdras 5

¹Den e aña ei dos profeta, Hagai i Zakarías, yu di Ido, a duna e hudiunan na Huda i Herusalèm e mensahenan ku nan tabata risibí serka SEÑOR, Dios di Israel.

²E ora ei Zerubabel, yu di Shealtiel, i Yeshua, yu di Yosadak, a kuminsá lanta e tèmpel na Herusalèm atrobe, ku sosten di e dos profetanan.

³Pero mesora Tatnai, gobernador di e provinsia parti wèst di riu Eufrat, Shetar Boznai i nan koleganan a bai serka e hudiunan i puntra: ‘Ken a duna boso òrdu pa rekonstruí e tèmpel akí i akab'é? Kon yama e hendenan ku ta trahando riba dje?’

⁵Pero Dios tabata protegé e lidernan hudiu, di manera ku Tatnai i e otronan a disidí di no stòp e trabou promé ku nan manda rospondi pa Dario i risibí kontesta.

⁶Aki ta sigui teksto di e karta ku Tatnai, gobernador di e provinsia parti wèst di riu Eufrat, Shetar Boznai i nan koleganan, nan funshonarionan di gobièrnu parti wèst di riu Eufrat, a manda pa rei Dario.

⁷Esaki tabata nan relato: ‘Na rei Dario. Nos ta spera ku su mahestat ta gosando di un salú perfekto.

⁸Nos ke laga su mahestat sa ku nos a bishitá e region di Huda pa inspektá tèmpel di e gran Dios. Nan ta rekonstruí e tèmpel ku piedra grandi i nan ta fura e murayanan ku palu. Nan ta traha ku dedikashon i e trabou ta avansando rápidamente bou di nan man.

⁹Nos a interogá e lidernan pa sa ken a duna òrdu pa rekonstruí e tèmpel i akab'é.

¹⁰Tambe nos a puntra nan kon yama e personanan ku ta dirigí nan, pa nos nota nan nòmber manda pa su mahestat.

¹¹Nan kontesta tabata: “Nos ta sirbidó di e Dios di shelu i tera i nos ta rekonstruí e tèmpel ku siglonan largu tabata pará aki. Un gran rei di Israel a konstruyé i akab'é.

¹²Nos antepasadonan a lanta rabia di e Dios di shelu i esei a pone ku El a entregá nan den man di e kaldeo Nebukadnèsar, rei di Bábel. Nebukadnèsar a destruí e tèmpel akí i a hiba nos pueblo den eksilio na Babilonia.

¹³Despues, den e promé aña di reinado di Korèsh, rei di Bábel, el a duna òrdu pa rekonstruí e tèmpel akí.

¹⁴Tambe rei Korèsh a debolbé e ophetonan di uso di oro i plata ku Nebukadnèsar a yega di saka for di tèmpel na Herusalèm hiba tèmpel di Bábel. Korèsh a entregá un tal Sheshbasar nan, un hòmber ku el a nombra gobernador.

¹⁵El a orden'é pa hiba e ophetonan di uso bèk na e tèmpel di Herusalèm i rekonstruí e kas di Dios na e mesun sitio.

¹⁶E Sheshbasar akí a pone fundeshi di tèmpel na Herusalèm i for di e dia ei nan a traha riba dje, pero te ainda e no ta kla.”

¹⁷Asina ta, si su mahestat haña ta bon, laga hasi un investigashon den e archivonan di rei na Bábel pa haña sa si enberdat rei Korèsh a duna òrdu pa rekonstruí e tèmpel na Herusalèm. Nos ta spera un kontesta tokante desishon di su mahestat.’