Read Papiamento Nehemías 2 Bible Online

Nehemías 2 - Papiamento bible

Nehemías 2

¹Riba un dia den luna di Nisan di e mes aña ei[1] rei Artaxèrxès tabata kome i mi a sirbié biña; el a ripará ku mi kara tabata tristu i komo nunka esei no tabata e kaso den su presensia

²el a puntra mi: ‘Di kon bo kara ta tristu asina? Bo no ta malu, mester tin algu ta preokupá bo.’ Mi a hiba un sustu na e momento ei

³i bisa rei: ‘Biba rei pa semper! Kon mi kara por laga di ta tristu? Nan a destruí e siudat kaminda mi antepasadonan ta derá i kandela a kaba ku su portanan.’

⁴‘Kiko mi por hasi pa bo?’ rei a puntra mi. Mi a pidi Dios di shelu yuda mi

⁵i mi a kontestá: ‘Si su mahestat no tin nada kontra i si su mahestat ke mi bon, laga mi bai Huda pa mi rekonstruí e siudat kaminda mi antepasadonan ta derá.’

⁶Rei ku tabatin su esposa sintá banda di dje, a puntra mi: ‘Kuantu tempu e biahe lo dura i ki tempu bo ta bini bèk?’ Asina ta ku el a duna mi pèrmit pa bai. Mi a bis'é ki tempu mi a pensa di bini bèk.

⁷Mi a bis'é: ‘Si su mahestat ke mi bon, por fabor, duna mi karta pa e kansiernan parti wèst di riu Eufrat, pa nan laga mi pasa sin problema bai Huda.

⁸Su mahestat por duna mi un karta tambe pa Asaf ku ta enkargá ku maneho di e boskenan di reino, pa e entregá mi palu pa e portanan di e fòrti ku ta pertenesé na tèmpel, pa e murayanan di siudat i pa e kas ku mi ta bai keda aden?’ Rei a duna mi tur kos, grasia na SEÑOR.

⁹Mi a yega serka e kansiernan parti wèst di riu Eufrat i mi a entregá nan e kartanan di rei. Tambe rei a laga ofisialnan di ehérsito i sòldánan di kabayeria bai ku mi.

¹⁰Pero ora Sanbalat di Bet-Horon i e funshonario amonita Tobias a tende esaki, nan a rabia mashá, pasobra a bini un hende ku ker a traha na bienestar di e israelitanan.

¹¹Ora mi a yega Herusalèm mi a sosegá tres dia

¹²sin bisa ningun hende loke Dios a pone den mi kurason pa hasi pa Herusalèm. Despues mi a sali den anochi huntu ku algun hòmber. E úniko bestia ku mi tabatin huntu ku mi tabata esun ku mi tabata kore riba dje.

¹³Asina ta ku e anochi ei mi a pasa pa Porta di Vaye bai den direkshon di Bròn di Dragon i Porta di Kima Sushi, pa inspektá muraya di Herusalèm, ku tabata bashá abou, i e portanan di siudat, ku kandela a destruí.

¹⁴Mi a sigui bai te na Porta di Bròn i Dam di Rei, pero aya mi buriku no por a pasa mas.

¹⁵P'esei mi a pasa e anochi ei den e vaye bai ariba pa inspektá e muraya. Despues mi a pasa pa Porta di Vaye bini bèk.

¹⁶E lidernan no tabata sa unda mi a bai ni kiko mi a hasi. Te na e momento ei mi no a pone e hudiunan na altura, ni sikiera e saserdotenan, e gobernantenan i e otro funshonarionan ku tabatin di aber ku e trabou.

¹⁷Awor sí mi a bisa nan: ‘Boso mes por weta ku nos ta den un situashon deplorabel. Muraya di Herusalèm ta bashá abou i su portanan ta destruí pa kandela. P'esei mi ta proponé pa nos rekonstruí e muraya di siudat, pa nan no sigui hasi chèrchè di nos.’

¹⁸Ora mi a bisa nan ku SEÑOR tabata ku mi i a konta nan loke rei a bisa mi, nan a kontestá: ‘Awèl, laga nos kuminsá ku rekonstrukshon.’ I ku ánimo nan a prepará pa kuminsá ku e bon trabou.

¹⁹Pero ora Sanbalat di Bet-Horon, e funshonario amonita Tobias i e arabir Guèshèm a haña sa esei, nan a hasi chèrchè di nos i ku despresio nan a bisa nos: ‘Kiko boso ta hasiendo ei? Akaso ta rebeldiá boso ke rebeldiá kontra rei?’

²⁰Pero mi a laga nan sa: ‘Dios di shelu mes lo yuda nos, p'esei nos lo logra. Nos ta su sirbidó, nos ta prepará pa kuminsá ku e rekonstrukshon. Pero na Herusalèm boso no tin ningun propiedat ni outoridat, aworó tur hende aki a lubidá boso.’