Read Papiamento Nehemías 4 Bible Online

Nehemías 4 - Papiamento bible

Nehemías 4

¹ Ora Sanbalat a tende ku nos tabata rekonstruí e muraya, e tabata skupi kandela di rabia; el a hasi chèrchè di e hudiunan.

²El a bisa den presensia di su koleganan i e sòldánan di ehérsito di Samaria: ‘Ta kiko e pobersitu hudiunan ei ta kere? Ku nan mes por hasi e trabou akí òf ku nan lo por ofresé sakrifisio atrobe? Nan ta kere ku nan por terminá e trabou den un dia? Òf ku nan por lanta e muraya ku e piedranan kimá ku nan a saka for di e ruina ei?’

³E amonita Tobias ku tabata pará banda di dje, a kontestá: ‘Ai, maske kuantu nan traha, un zoro so lo por basha e muraya di piedra ei abou, si e bula riba dje.’

⁴E ora ei mi a resa: ‘Mi Dios, tende kon nan ta hasi chèrchè di nos ei. Laga nan ofensanan kai riba nan mes kabes. Entregá nan den man di enemigu komo botin i laga nan bai un pais strañero komo prezu.

⁵No pordoná nan maldat ni no sera wowo pa nan pikánan, pasobra nan a insultá esnan ku ta rekonstruí e muraya.’

⁶Nos a sigui ku rekonstrukshon di e muraya i nos a yega na mitar di e altura nesesario, pasobra e pueblo tabata traha ku smak.

⁷Pero ora Sanbalat, Tobias i tambe e arabirnan, e amonitanan i e hendenan di Ashdod a haña sa ku rekonstrukshon di e muraya di Herusalèm tabata avansá i ku e burakunan den dje tabata kasi tur será, nan a bira furioso.

⁸Nan a sera kabes pa sali bai bringa kontra Herusalèm i bruha tera aya.

⁹Pero nos a resa na nos Dios i nos a pone guardia di dia i anochi pa defendé nos kontra nan.

¹⁰E hudiunan a bisa: ‘Nos no por karga kos mas, e kantidat di piedra ta muchu grandi. Nos no ta kapas pa rekonstruí e muraya akí.’

¹¹Nos enemigunan a pensa ku nos lo no ripará nada te ora nan ta meimei di nos. E ora ei nan lo mata nos i para e trabou.

¹²E hudiunan ku tabata biba meimei di nan, a bin bisa nos mas ku dies bia di tur banda: ‘Boso mester bini bèk serka nos.’

¹³E ora ei mi a ordená e hendenan bai para, famia pa famia, tras di e muraya, na e partinan mas abou di siudat, na e lugánan ku no tabata protegé, ku nan spada, lansa i bog den man.

¹⁴Ora mi a mira nan pará, mi a aserká nan i mi a bisa e siudadanonan prominente, e lidernan i sobrá di e pueblo: ‘Boso no mester tin miedu di e hendenan ei; kòrda kon grandi i temibel Señor ta. Lucha pa boso rumannan, boso yunan muhé i hòmber, boso kasá i boso kas.’

¹⁵Ora nos enemigunan a haña sa ku nos a deskubrí nan intenshon i ku Dios a frustra nan plannan, nos tur por a bolbe bèk na e muraya, kada ken na su trabou.

¹⁶For di e dia ei, mitar di mi hendenan tabata hasi e trabou i e otro mitar tabata tene warda, bon armá ku lansa, eskudo, bog i korasa. E lidernan di Huda a duna e pueblo ku tabata rekonstruí e muraya, tur nan apoyo. E kargadónan a sigui hiba karga, pero nan tabata traha ku un man i tabata tene lansa ku e otro man.

¹⁸Tur e trahadónan tabatin nan spada na kustia i banda di mi tabatin un hende kla pa supla kachu pa bati alarma.

¹⁹Mi a bisa e siudadanonan prominente, e lidernan i sobrá di e pueblo: ‘E trabou ta asina grandi ku nos ta plamá riba henter e largura di e muraya, leu for di otro.

²⁰Asina boso tende kachu, boso mester djòin nos, nos Dios lo bringa pa nos.’

²¹Asina ta ku nos tabata traha for di ora di dia habri te ora strea sali, miéntras ku mitar di e hòmbernan tabata karga lansa.

²²Tambe mi a ordená e pueblo mesora pa kada hende ku su ayudantenan pasa nochi den Herusalèm pa nan tene warda durante anochi i traha den dia.

²³Ni ami, ni mi famianan, ni mi sirbidónan, ni e guardianan ku tabata serka mi, no tabata kita paña, si no tabata pa dal un baño.