Read Papiamento Ester 2 Bible Online

Ester 2 - Papiamento bible

Ester 2

¹Despues di algun tempu, ora rei Xèrxès su rabia a baha, el a bolbe pensa riba Washti, riba loke Washti a hasi i kua desishon a tuma kontra dje.

²E ora ei funshonarionan na korte real a bis'é: ‘Rei mester nombra komisario den tur provinsia di su reino pa nan buska señorita yòn i bunita p'e. E hendenan ku rei nombra mester trese e señoritanan yòn i bunita akí na fòrti Susan i hiba nan na e kas kaminda rei su harem ta keda bou di kuido di Hegai, e eunuko di rei, ku ta enkargá ku e muhénan. Ei nan mester haña un tratamentu di beyesa.

⁴Esun ku rei haña mas bunita ta bira reina na lugá di Washti.’ Rei a gusta e idea i a aktua manera nan a proponé.

⁵Na fòrti Susan tabatin un hòmber hudiu ku yama Mordekai, for di tribu di Benhamin. Dor di su antepasadonan Yair i Shimi e tabata desendiente di Kish. E tabata un di e hendenan ku rei Nebukadnèsar di Bábel a deportá for di Herusalèm, huntu ku Yekonías, rei di Huda.

⁷Mordekai tabata tata di kriansa di Hadasa, esta Ester, su prima, pasobra Hadasa no tabatin ni tata ni mama mas. E tabata un bunita mucha muhé i e tabatin un bunita kurpa. Dia su tata i su mama a muri, Mordekai a adopt'é.

⁸Ora a proklamá e dekreto di rei, nan a trese hopi mucha muhé huntu na fòrti Susan i a pone nan bou di supervishon di Hegai, ku tabata enkargá ku e muhénan. Ester tambe a keda interná den palasio di rei.

⁹E mucha muhé a kai na agrado di Hegai i a gana su apresio. Mesora Hegai a dun'é kosmétika i kuminda balansá. Tambe el a haña shete di e mihó mucha muhénan di palasio di rei pa atend'é. Hegai a hiba Ester i e sirbientenan na e mihó kambernan di e kas kaminda rei tabatin su harem.

¹⁰Ester no a konta nada di su pueblo ni di su famia pasobra Mordekai a bis'é pa no hasié.

¹¹Tur dia Mordekai tabata kana pasa dilanti di patio di e kas kaminda e muhénan tabata keda, pa el a sa kon tabata bai ku Ester i kon nan tabata trat'é.

¹²Pa e mucha muhénan tabatin e stipulashon ku diesdos luna largu nan tur mester a haña nan tratamentu di beyesa. E promé seis lunanan nan mester a hunta nan kurpa ku zeta di mira; e sobrá seis lunanan nan tabatin ku hunta nan kurpa ku diferente sorto di perfume i otro tipo di kosmétika. Ora e tempu ei pasa, kada mucha muhé ku ta na bùrt, mester a presentá serka rei Xèrxès.

¹³For di e kas kaminda nan tabata keda e mucha muhé tabatin mag di bai, ku tur loke e tabata ke, serka rei.

¹⁴E tabata bai anochi i e tabata bini bèk mainta. I e ora ei e tabata pasa pa un otro departamento, kaminda Shaashgaz, eunuko di rei, tabata kuida e konkubinanan di rei. E mucha muhé no tabata bai bèk serka rei, sino te ora rei tabatin deseo di dje i manda yam'é.

¹⁵Un dia tabata bùrt di Ester, yu di kriansa di Mordekai i yu di Abihail, Mordekai su tio. El a bai serka rei ku solamente loke e eunuko Hegai a konseh'é. Ester a gana atmirashon di tur esnan ku a mir'é.

¹⁶Pues nan a hiba Ester palasio real pa e presentá dilanti di rei Xèrxès. Tabata den e di dies luna, luna di Tebet, di e di shete aña di gobièrnu di Xèrxès.

¹⁷I Xèrxès a namorá di Ester. El a gusta Ester mas ku tur otro muhé i Ester tabata haña mas kariño i amor ku tur e otro mucha muhénan. Xèrxès a pone e korona real riba kabes di Ester i asina el a nombra Ester reina na lugá di Washti.

¹⁸Despues el a hasi un fiesta grandi na honor di Ester. El a invitá tur su mandatarionan i su funshonarionan. El a kanselá belasting di tur provinsia i a parti regalo na un manera generoso, digno di un rei.

¹⁹Mordekai tabata sintá na porta di palasio ora pa di dos be nan tabata trese señoritanan huntu.

²⁰Manera Mordekai a mand'é, Ester no a konta ningun hende nada di su famia ni di su pueblo. Pues e tabata kumpli ku òrdu di Mordekai meskos ku tempu Mordekai tabata sòru p'e.

²¹Miéntras Mordekai tabata sintá na porta di palasio, Bigtan i Tèrèsh, dos warda di e apartamentunan real, ku tabata malkontentu ku rei, a traha plan pa kit'é for di kaminda.

²²Ora Mordekai a tende di e kòmplòt, el a konta reina Ester i Ester a bai konta rei pa Mordekai.

²³Rei a laga investigá e asuntu i tur kos a bin sali na kla. Nan a kologá e dos ofisialnan na palu di horka i den presensia di rei nan a skibi e relato di loke a sosodé den krónikanan di e reino.