Read Papiamento Ester 3 Bible Online

Ester 3 - Papiamento bible

Ester 3

¹Despues di algun tempu Haman, yu di Hamdata, desendiente di Agag, a haña promoshon serka rei Xèrxès. El a haña un puesto importante den gobièrnu. E tabatin outoridat riba tur otro mandatario di e reino di rei Xèrxès.

²Tur sirbidó di rei ku tabata presente na porta di palasio tabata hinka rudia i bùig te na suela pa Haman. Esei tabata òrdu di rei. Mordekai si no kièr a hinka rudia ni bùig te na suela.

³E ora ei funshonarionan di rei ku tabata na porta di palasio a puntra Mordekai di kon e no tabata kumpli ku òrdu di rei.

⁴El a kontestá nan ku e ta hudiu. Tur dia nan tabata puntra meskos pero e no tabata hasi kaso. Despues nan a bai konta Haman pa wak si Mordekai ta keda tèrko den loke e tabata hasi.

⁵Ora Haman a ripará ku Mordekai no tabata hinka rudia ni bùig te na suela p'e, un rabia a drent'é.

⁶I ya ku nan a bis'é ku Mordekai tabata hudiu, e no tabata ke mata Mordekai so, sino e ker a hasi tur loke tabata na su alkanse pa kaba ku tur hudiu, pueblo di Mordekai, den henter reino di Xèrxès.

⁷Tabata luna di Nisan, e promé luna di e di diesdos aña di gobièrnu di Xèrxès. Den presensia di Haman nan a tira lòt, ku nan tabata yama Pur, pa nan haña un fecha adekuá. Nan a tira lòt riba tur dia i riba tur luna. Al fin i al kabo lòt a bin kai riba e di diesdos luna, luna di Adar.

⁸E ora ei Haman a bisa rei Xèrxès: ‘Tin un sierto pueblo ku ta plamá den tur provinsia di bo reino. Nan ta biba huntu ku e otro pueblonan pero no ta mete ku nan. Nan leinan ta otro for di esnan di tur otro pueblo i nan no ta kumpli ku e leinan di su mahestat. No ta kumbiní su mahestat pa laga nan sigui asina.

⁹P'esei, si su mahestat ta bai di akuerdo, laga publiká un dekreto pa kaba ku nan. Ami di mi parti lo entregá 300.000 kilo di plata den man di e funshonarionan ku mester deposit'é den kaha real.’

¹⁰E ora ei rei a kita su renchi ku seyo i a duna Haman, enemigu di hudiu ei, ku tabata desendiente di Agag i yu di Hamdata.

¹¹El a bis'é: ‘Keda ku bo plata i hasi loke bo ke ku e pueblo ei.’

¹²Riba e di diestres dia di e promé luna a manda yama tur e sekretarionan di rei i konforme e òrdu di Haman a manda karta pa funshonarionan altu di rei, pa e gobernadornan di kada estado i pa e hefenan di kada pueblo; kada provinsia a haña un karta segun su mes sistema di skibi i kada pueblo na su mes idioma. E tabata skibí na nòmber di rei Xèrxès i e tabata seyá ku e seyo di su renchi.

¹³Mensaheronan a bai purá ku karta pa tur provinsia di rei. E dekreto tabata bisa: ‘Mester mata, destruí i kaba ku tur hudiu den ún dia. Sea nan ta yòn òf bieu, mucha òf hende muhé. Tambe mester tuma nan propiedat komo botin. Esaki mester sosodé riba dia diestres di e di diesdos luna, luna di Adar.’

¹⁴Nan mester a publiká kopia di e dekreto komo lei den tur provinsia i laga tur pueblo sa, pa nan prepará pa e dia ei.

¹⁵Riba òrdu di rei e mensaheronan a sali purá i e lei a keda publiká den fòrti Susan. Miéntras rei i Haman a bai sinta bebe, siudat Susan a bira tur aríbabou.