Read Papiamento Ester 5 Bible Online

Ester 5 - Papiamento bible

Ester 5

¹Riba e di tres dia Ester a bisti su trahe di reina i a bai para den e patio parti paden di palasio ku kara pa e sala di rei. Ei rei tabata sintá riba su trono real, ku tabata enfrente di e entrada.

²Ora rei a mira reina Ester den patio, el a keda enkantá. Rei a presentá Ester e staf di oro ku e tabatin den su man. Ester a yega serka i mishi ku punta di e staf.

³Rei a puntr'é: ‘Kiko falta reina Ester; kiko bo ta deseá? Si ta mitar di mi reino mes bo pidi mi, bo ta hañ'é.’

⁴Ester a bisa: ‘Si ta na agrado di su mahestat, bini ku Haman na e bankete ku mi tin prepará na honor di su mahestat.’

⁵Mesora rei a duna òrdu: ‘Buska Haman awor akí pa kumpli ku deseo di reina Ester.’ Asina rei i Haman a bai e bankete ku reina Ester a prepará.

⁶Na ora di bebe biña rei a puntra Ester: ‘Kiko bo ta deseá? Lo mi duna bo e. Kiko bo ke pidi mi? Si ta mitar di mi reino mes, bo ta hañ'é!’

⁷Ester a kontestá: ‘Esaki ta mi súplika i mi deseo:

⁸Si su mahestat tin kariño pa mi i si ta na agrado di su mahestat di kumpli ku mi deseo i hasi loke mi ta pidi: bini mañan ku Haman, ora mi bolbe prepará un bankete na shonnan su honor. E ora ei mañan lo mi kontestá e pregunta di su mahestat.’

⁹E dia ei Haman a bai kas mashá kontentu i satisfecho. Pero ora el a mira Mordekai na porta di palasio, un rabia a drent'é pasobra Mordekai ni sikiera a move te pa e lanta para p'e.

¹⁰Sinembargo Haman a dominá su mes i ora el a yega kas, el a manda yama su amigunan i su kasá Zèrèsh.

¹¹El a konta nan kon riku e tabata, kuantu yu e tabatin i kuantu honor rei a dun'é. Tambe el a konta nan kon rei a dun'é un puesto riba tur otro mandatario i funshonario.

¹²El a agregá: ‘Ademas, fuera di rei, mi ta e úniko ku reina Ester a invitá na su bankete i pa mañan tambe mi ta invitá pa ta presente huntu ku rei.

¹³Tòg mi no ta satisfecho ku niun di e kosnan akí, tanten ku mi ta mira e hudiu Mordekai sintá na porta di palasio.’

¹⁴E ora ei su kasá Zèrèsh i tur su amigunan a bis'é: ‘Laga traha un palu di 25 meter altu i mañan mainta trempan bo ta pidi rei pa laga kologá Mordekai na dje. Despues bo por bai kome kontentu ku rei.’ Haman a gusta e idea i el a laga lanta e palu di horka.