Read Papiamento Ester 6 Bible Online

Ester 6 - Papiamento bible

Ester 6

¹E anochi ei rei no por a drumi. P'esei el a manda buska e buki ku tin tur suseso importante di su pais skibí aden i a laga hende lesa p'e.

²Nan a bin topa e relato kaminda Mordekai a denunsiá e kòmplòt ku e dos funshonarionan di rei su warda personal, Bigtan i Tèrèsh, a traha pa mata rei Xèrxès.

³E ora ei rei a puntra: ‘Ki honor Mordekai a haña pa loke el a hasi? A dun'é un kondekorashon?’ Su sirbidónan personal a kontestá: ‘E no a haña nada!’

⁴Nèt e ora ei Haman a yega riba plenchi di palasio pa e pidi rei pa laga kologá Mordekai na e palu di horka ku el a lanta p'e. Rei a puntra: ‘Ken ta riba plenchi?’ E funshonarionan a kontestá:

⁵‘Ta Haman!’ Rei a duna òrdu: ‘Lag'é drenta!’

⁶Haman a drenta i rei a puntr'é: ‘Kiko mester hasi ku un hende ku rei ke duna honor?’ Haman a pensa: ‘Ta ken otro ku no ta ami ta esun ku rei ke duna honor?’

⁷P'esei el a rospondé: ‘Ku un hende ku rei ke duna honor?

⁸Laga trese un mantel real ku rei mes sa bisti; i un kabai ku rei mes sa kore. E kabai mester tin un kokèt real riba su kabes.

⁹Mester entregá e mantel i e kabai na un mandatario altu di gobièrnu ku ta di noblesa, pa e bisti e hende ku rei ke duna honor. E mester pone e hende ku rei ke duna honor riba e kabai i kana ku e kabai riba plenchi di siudat i grita pa tur hende tende: “Asin'akí sa hasi ku un hende ku rei ke duna honor!” ’

¹⁰E ora ei rei a bisa Haman: ‘Hasi lihé; bai buska e mantel i e kabai i hasi manera bo a proponé ku e hudiu Mordekai ku ta sintá na porta di palasio. Kumpli ku kada palabra ku bo a bisa.’

¹¹Haman a kohe e mantel i e kabai. El a bisti Mordekai, pon'é riba e kabai i kana kuné riba plenchi di siudat. E tabata grita pa tur hende tende: ‘Asin'akí sa hasi ku un hende ku rei ke duna honor.’

¹²Despues Mordekai a bai bèk porta di palasio pero Haman a pura bai kas; el a sintié asina kibrá ku el a tapa su kara.

¹³El a konta su kasá Zèrèsh i tur su amigunan tur loke a pasa kuné. Su konseheronan a bis'é: ‘Si e Mordekai ei ta pertenesé na e pueblo hudiu, lo bo no por gan'é mas. Bo derota di awe ta djis kuminsamentu di bo destrukshon.’

¹⁴Promé ku nan a kaba di papia, ata sirbidónan personal di rei a bin buska Haman pa hib'é mesora na e bankete ku Ester a prepará.