Read Papiamento Ester 9 Bible Online

Ester 9 - Papiamento bible

Ester 9

¹Riba dia diestres di e di diesdos luna, luna di Adar, mester a kumpli ku e dekreto di rei. E dia ei e enemigu a kere ku e por a gana poder riba e hudiunan, pero a sosodé nèt kontrali: a resultá e dia ei ku e hudiunan a poderá di nan enemigunan.

²Den tur provinsia di rei Xèrxès hudiunan a reuní den e siudatnan kaminda nan tabata biba, pa nan ataká esnan ku tabata ker a kaba ku nan. Ningun hende no por a enfrentá nan pasobra tur e pueblonan tabatin miedu di nan.

³Tur e gobernadornan di e estadonan, e gobernadornan di e provinsianan, otro mandatarionan provinsial i demas empleado di rei a tuma parti pa e hudiunan, pasobra nan tabatin miedu di Mordekai.

⁴Mordekai a haña hopi influensia den palasio awor i su fama a kore den tur e provinsianan, pasobra Mordekai tabata bira mas i mas poderoso.

⁵Ku spada hudiunan a ataká tur nan enemigunan, mata nan i kaba ku nan. Nan a hasi loke nan tabata ke ku nan enemigunan.

⁶Den fòrti na Susan so nan a kaba ku 500 hende.

⁷Tambe nan a mata Parshandata, Dalfon, Aspata

⁸Porata, Adalia, Aridata,

⁹Parmashta, Arisai, Aridai i Waizata,

¹⁰e dies yu hòmbernan di Haman, yu di Hamdata, i enemigu di hudiunan. Pero e hudiunan no a mishi ku nan propiedat sí.

¹¹E mes dia ei, ora rei Xèrxès a tende kuantu morto tabatin den fòrti na Susan,

¹²el a bisa reina Ester: ‘Si e hudiunan a mata 500 hende den fòrti Susan i tambe e dies yunan di Haman, kuantu hende mas nan lo no a mata den e otro provinsianan di mi reino? Kiko mas bo ta deseá? Lo mi duna bo e. Kiko mas bo ke pidi mi? Bo ta hañ'é!’

¹³Ester a kontestá: ‘Si ta na agrado di su mahestat, duna e hudiunan na Susan pèrmit pa mañan nan hasi meskos ku e dekreto di rei a pèrmití nan hasi awe i laga nan kologá kurpa di e dies yunan di Haman na palu.’

¹⁴Rei a ordená pa hasi loke Ester a pidi i e dekreto a keda publiká na Susan. Nan a kologá kurpa di e dies yunan di Haman na palu.

¹⁵Asina e hudiunan ku tabata biba na Susan a bolbe reuní riba dia dieskuater di luna di Adar i ei nan a mata 300 hende mas. Pero nan no a mishi ku propiedat di e hendenan.

¹⁶E hudiunan ku tabata biba otro kaminda den e provinsianan di e reino a reuní riba dia diestres di luna di Adar, pa nan defendé nan bida. Asina nan a skapa di nan enemigunan. Nan a mata 75.000 enemigu sin mishi ku nan propiedat. Dia dieskuater nan a sosegá i nan a hasi e dia ei un dia di komementu i di alegria.

¹⁸Pero komo e hudiunan di Susan a reuní dianan diestres i dieskuater, nan a sosegá dia diessinku i a selebrá e dia ei ku komementu i alegria.

¹⁹P'esei e hudiunan ku ta biba den e pueblonan pafó di stat ku no tin muraya rondó di nan, ta selebrá dia dieskuater di luna di Adar, ku alegria i komementu i riba e dia ei nan sa regalá otro kos di boka dushi.

²⁰Mordekai a skibi tur e susesonan akí i el a manda karta pa tur hudiu ku tabata biba serka òf leu den tur e provinsianan di rei Xèrxès.

²¹Den e karta el a duna tur hudiu òrdu pa kada aña nan selebrá dianan dieskuater i diessinku di luna di Adar.

²²Pasobra ta riba e dianan akí nan a skapa di nan enemigunan i ta den e luna akí nan tristesa a kambia bira alegria i nan rou a kambia bira fiesta. Nan mester a selebrá e dianan akí ku komementu i ku alegria, regalá otro kos di boka dushi i duna pobernan limosna.

²³Asina e karta ku Mordekai a skibi a hasi ku e selebrashon ku e hudiunan mes a kuminsá kuné, a para bira un kustumber.

²⁴Nan a yama e dianan akí Purim, di e palabra ‘pur’ ku ta nifiká lòt. Pasobra Haman, yu di Hamdata, desendiente di Agag i enemigu di hudiunan, tabatin pensá di kaba ku tur hudiu i el a tira lòt pa disidí ta riba kua dia e por a ataká i destruí nan. Ora rei a bin haña sa, el a duna òrdu skibí pa laga tur malu ku Haman tabatin pensá di hasi ku hudiunan kai riba e mes. P'esei nan a kologá Haman i su yunan na palu. Pa motibu di e karta akí di Mordekai, pa loke nan a mira ku nan mes wowo i pa loke nan mes a pasa aden,

²⁷e hudiunan a tuma komo obligashon pa tur aña nan selebrá e dos dianan akí. Esei tabata pa nan mes, pa nan desendientenan i pa tur ku lo bira hudiu. Nan lo no falta ni un aña i selebrá e dianan ei na e manera preskribí i riba e fecha indiká.

²⁸Nan lo rekordá i selebrá e dianan akí di generashon pa generashon den kada famia, kada provinsia i kada siudat, pa semper e hudiunan i nan desendientenan keda kòrda i keda selebrá e dianan akí di Purim.

²⁹Reina Ester, yu di Abihail, i e hudiu Mordekai huntu a skibi un di dos karta. Ester a usa tur su outoridat pa e fiesta di Purim bira un obligashon.

³⁰A manda kopia di e karta, ku palabranan pa un pas berdadero, pa tur hudiu den e 127 provinsianan di reino di Xèrxès.

³¹E karta tabata konfirmá selebrashon di e dianan akí di Purim den e temporada indiká. E obligashon no a bini di parti di e hudiu Mordekai i reina Ester so, pero e hudiunan tambe a obligá nan mes i nan desendientenan. E karta tabata bisa tambe kon mester a yuna i kon mester a tene rou.

³²E dekreto di Ester ku a konfirmá e reglanan enkuanto selebrashon di Purim, ta skibí den un buki.