Read Papiamento Éksodo 11 Bible Online

Éksodo 11 - Papiamento bible

Éksodo 11

¹Di antemano SEÑOR a bisa Moises: ‘Mi ta manda un plaga mas riba fárao i e egipsionan. Despues e ta laga boso bai. Asta e mes ta kore na malu ku boso.

²P'esei bisa e israelitanan hòmber i muhé pidi nan bisiñanan ophetonan di plata i di oro.’

³SEÑOR a sòru pa e egipsionan tabata generoso ku su pueblo. Tantu e funshonarionan di fárao komo e pueblo tabatin hopi rèspèt pa Moises.

⁴Moises a bisa fárao: ‘Esaki ta palabra di SEÑOR: “Meimei di anochi Mi ta pasa den Egipto.

⁵E ora ei tur e promé yu hòmbernan den e pais lo muri. For di e promé yu hòmber di fárao, ku mester siguié riba trono, te e yu hòmber mayó di e kriá ku ta mula trigo. E promé yu di kada bestia tambe ta muri.

⁶Lo tin lamento den henter e pais, manera nunka ántes tabatin, ni lo no bin tin hamas.

⁷Pero e israelitanan i nan bestianan lo no kore ningun peliger. Ni kachó lo no grita nan. Esei ta pa bo sa ku SEÑOR ta hasi distinshon entre egipsio i israelita.” ’

⁸Moises a sigui bisa fárao: ‘Tur bo funshonarionan lo bini serka mi i na rudia nan lo roga mi pa mi i e pueblo ku ta sigui mi bai. E ora ei lo mi bai.’ Bon rabiá el a sali bai laga fárao.

⁹Delantá SEÑOR a bisa Moises: ‘Fárao lo no skucha bo, pa asina Mi por hasi mas milager na Egipto.’

¹⁰Moises i Aaron a hasi tur e milagernan akí pa fárao por a mira, pero SEÑOR a hasié tèrko, p'esei e no a laga e israelitanan sali for di su pais.