Read Papiamento Éksodo 21 Bible Online

Éksodo 21 - Papiamento bible

Éksodo 21

¹SEÑOR a sigui: ‘Duna e israelitanan e siguiente reglanan tambe.

²Ora bo kumpra un katibu hebreo, e mester sirbi bo seis aña, pero e di shete aña bo mester lag'é liber sin ku e tin nada di paga.

³Si ta e so a bini, e mester bai e so tambe. Si e tabata kasá dia el a bini, e mester bai ku su kasá.

⁴Si su shon a dun'é un esposa i e katibu tin yu ku e muhé, e muhé i yunan ta keda propiedat di e shon. E ora ei e katibu mester bai e so.

⁵Pero si e katibu bisa bon kla ku e ta stima su shon, ku e ta stima su kasá i su yunan i e bisa ku e no ke ta liber,

⁶e shon ta obligá di pidi Dios para testigu.[12] E shon mester pone e katibu kontra porta òf kontra kozein i bora su orea ku un opheto skèrpi i e katibu ta keda semper den su servisio.

⁷Si un hende bende su yu muhé komo katibu, e yu ei no ta bira liber manera un katibu hòmber ta bira liber.

⁸Si su shon ker a tum'é komo esposa, pero despues e no kai na agrado di e shon, e shon mester laga e famianan kumpr'é bèk. E shon no tin derechi di bende e muhé ku strañero, pasobra ta e mes no a kumpli ku su palabra.

⁹Si e shon a destin'é pa su yu hòmber, e shon mester trat'é meskos ku e ta trata su yu muhénan.

¹⁰Si e shon tuma un muhé mas aserka, e no mag duna e promé muhé ménos kuminda ni ménos paña. Tampoko e no mag drumi ménos kuné.

¹¹Si e no kumpli ku e tres obligashonnan akí, e muhé mag bai lag'é sin tin nada di paga.

¹²Si un hende dal un otro hende mata, e mester haña kastigu di morto.

¹³Si e no a mata intenshonalmente, pero ta un desgrasia ku Dios a laga sosodé, e por hui bai un siudat, ku SEÑOR indiká.

¹⁴Si un hende mata su próhimo ku un triki i intenshonalmente, ni na mi altá e no por haña protekshon; kit'é fo'i djei i mat'é.

¹⁵Si un hende dal su tata òf su mama, e mester haña kastigu di morto.

¹⁶Si un hende usa violensia pa kita libertat di un otro hende, sea ku el a bend'é kaba òf ku e tin e den su poder ainda, e hende ei mester haña kastigu di morto.

¹⁷Si un hende maldishoná su tata òf su mama, e mester haña kastigu di morto.

¹⁸Si dos hòmber bringa ku otro i esun dal e otro ku un piedra òf ku su moketa di tal manera ku e otro no ta muri pero mester keda na kama,

¹⁹esun ku a dal no ta haña kastigu si e otro lanta for di kama i kana atrobe i por kana pafó ku un garoti. Wèl e mester paga pa e tempu ku e otro a hañ'é obligá di tuma sosiegu i e mester paga tur gastu di rekuperashon.

²⁰Si un hende bati su katibu, hòmber òf muhé, ku palu mata, mester kastig'é.

²¹Pero si e katibu keda biba un òf dos dia mas, no ta kastig'é, komo ku e pèrdida di propiedat ya ta sufisiente kastigu.

²²Si dos hende hòmber ta bringa ku otro, i un di nan stot un muhé na estado, di manera ku e muhé ta pèrdè su yu, pero no ta haña otro leshon, e hòmber kulpabel mester paga but. Kasá di e muhé ta disidí kuantu e but mester ta i hues ta sòru pa e kulpabel paga.

²³Pero si e muhé sufri otro leshon, e siguiente regla ta konta: bida pa bida,

²⁴wowo pa wowo, djente pa djente, man pa man, pia pa pia,

²⁵kimá pa kimá, herida pa herida, marka di sla pa marka di sla.

²⁶Si un hende dal su katibu, hòmber òf muhé, den su wowo i esaki pèrdè su bista, e hende mester laga e katibu liber komo pago pa e wowo.

²⁷Si e dal su katibu, hòmber òf muhé, bula un djente, e mester lag'é liber komo pago pa e djente.

²⁸Si un toro hinka un hòmber òf un muhé mata, mester bati e toro ku piedra mata i no mag kome su karni. Doño di e bestia no tin falta.

²⁹Pero si e toro a yega di ataká hende kaba i e doño, ounke atvertí, no a tuma medida, mester bati e toro ku piedra mata, pero mester mata e doño tambe.

³⁰Si na lugá di kastigu di morto nan dun'é un but, e mester paga tur loke nan eksigí, pa asina e salba su bida.

³¹Mesun regla ta konta ora e toro hinka un mucha hòmber òf mucha muhé mata.

³²Pero si e hinka un katibu, hòmber òf muhé, mata, e doño mester paga e shon trinta moneda di plata, i mester bati e toro ku piedra mata.

³³Si un hende kita tapa for di un pos òf un hende koba un pos sin tap'é i un baka òf buriku kai aden,

³⁴doño di e pos mester paga tur daño, pero kadaver di e bestia ta keda p'e.

³⁵Si un toro hinka toro di un otro hende mata, e doñonan mester bende e toro bibu. Kaba nan ta parti e sèn i e toro morto den nan dos.

³⁶Pero si tabata konosí ku e toro a yega di ataká kaba, i tòg e doño a keda sin vigil'é, e mester duna un otro toro na lugá; kadaver di e bestia ta keda p'e.