Read Papiamento Éksodo 24 Bible Online

Éksodo 24 - Papiamento bible

Éksodo 24

¹SEÑOR a bisa Moises: ‘Subi bin serka Mi, abo, Aaron, Nadab i Abihu huntu ku setenta di e ansianonan, lider di Israel, pero hinka rudia na un bon distansia sí.

²Bo so mag yega te serka, e otronan nò. E pueblo no mag subi huntu ku bo.’

³Moises a bai bèk, el a konta e pueblo tur loke SEÑOR a bisa i tur e reglanan ku El a duna. Henter e pueblo a kontestá unánimemente: ‘Nos lo hasi tur loke SEÑOR a bisa.’

⁴Moises a skibi tur loke SEÑOR a bisa. Su manisé trempan el a traha un altá na pia di e seru i a lanta diesdos piedra, un pa kada di e diesdos tribunan di Israel.

⁵Despues el a laga algun hóben israelita bini; nan a ofresé sakrifisio di kandela i a mata toro pa ofresé sakrifisio di pas na SEÑOR.

⁶Moises a pone mitar di e sanger den poko skalchi i e otro mitar el a sprengu riba e altá.

⁷El a kohe e buki di aliansa i a les'é pa e pueblo tende. Nan a bisa: ‘Nos lo obedesé SEÑOR i hasi tur loke El a bisa.’

⁸E ora ei Moises a kohe e sanger i a sprengu e riba e pueblo. El a bisa: ‘Esaki ta sanger di e aliansa ku SEÑOR ta sera ku boso a base di tur e mandamentunan akí.’

⁹Moises a subi e seru huntu ku Aaron, Nadab, Abihu i setenta ansiano di Israel.

¹⁰Nan a mira e Dios di Israel. Bou di su pia tabatin manera un flur trahá di safiro, blou kla manera shelu mes.

¹¹E lidernan akí di Israel por a mira Dios, sin ku Dios a laga algu malu pasa nan. Nan a kome i bebe.

¹²SEÑOR a bisa Moises: ‘Sigui subi seru bini serka Mi i keda para. Lo Mi duna bo e tablanan di piedra ku e lei, esta e mandamentunan, ku Mi a skibi pa siña e israelitanan.’

¹³E ora ei Moises i su sirbidó Yozue a lanta para, anto Moises a subi e seru di Dios.

¹⁴El a bisa e ansianonan: ‘Keda warda aki riba nos, te ora nos bini bèk serka boso. Aaron i Hur ta keda serka boso. Ken ku por tin problema, akudí serka nan.’

¹⁵Ora Moises a kaba di papia, el a subi e seru i un nubia a tapa e seru.

¹⁶E gran splendor di SEÑOR a keda sosegá riba Seru Sinai i e nubia a tapa e seru durante seis dia. For di den e nubia SEÑOR a yama Moises riba e di shete dia.

¹⁷E israelitanan por a mira e gran splendor di SEÑOR riba kabes di e seru manera un kandela ku ta kima tur kos.

¹⁸Moises a drenta den e nubia i a sigui subi e seru. El a keda kuarenta dia i kuarenta nochi riba e seru.