Read Papiamento Éksodo 30 Bible Online

Éksodo 30 - Papiamento bible

Éksodo 30

¹Traha un altá di palu di akasia pa kima sensia ariba.

²E mester ta firkant: 50 sèntimeter largu i 50 sèntimeter hanchu. E mester ta un meter altu. E kachunan mester ta tur na un ku e altá.

³Fura e blat ariba, e bandanan i e kachunan ku oro puru i traha un leshi di oro rònt di dje.

⁴Pega na kada banda di e altá, bou di e leshi, dos renchi di oro. E renchinan ta pa pasa e baranan ora ta karga e altá.

⁵Traha e baranan di palu di akasia i fura nan ku oro.

⁶Pone e altá dilanti di e kortina tras di kual e arka ku dokumento di aliansa ta. Einan kaminda e arka ta, lo Mi topa ku bo.

⁷Tur mainta ora Aaron ta prepará e lampinan, e mester kima riba e altá sensia ku ta manda holó dushi;

⁸tambe ora nochi ta bai sera i e sende e lampinan. Ta un obligashon ku ta konta pa tur dia, pa tur generashon benidero.

⁹Riba e altá ei no mag kima ningun otro sorto di sensia, ni sakrifisio di kandela, ni ofrenda vegetal, ni basha biña riba dje komo ofrenda.

¹⁰Un be pa aña Aaron mester hunta sanger di e sakrifisio pa pordon di piká na e kachunan di e altá akí pa drecha tur kos atrobe entre boso ku Mi. Tur generashon mester hasié, kada aña di nobo. Pa Mi e altá ta algu mashá sagrado.’

¹¹SEÑOR a bisa Moises:

¹²‘Ora boso tene un senso pa sa kuantu hòmber israelita tin, kada un di nan mester duna Mi un suma pa salba su bida, ya e senso no ta bira fatal pa nan.

¹³Tur hende ku keda registrá mester duna un moneda di plata di sinku gram. Peso di e moneda mester kuadra ku e normanan bálido den santuario. E suma akí nan mester duna Ami.

¹⁴Esei ta konta pa tur hende hòmber for di binti aña bai ariba.

¹⁵Tantu esun riku komo esun pober mester paga e mesun suma, pasobra esei ta loke nan ta paga pa drecha tur kos atrobe entre nan ku Mi, ta e preis pa nan bida.

¹⁶E suma ta destiná pa kubri gastu di sirbishi den tènt di enkuentro. E donashon lo keda kòrda Mi ku tur kos a drecha atrobe entre e israelitanan ku Mi.’

¹⁷SEÑOR a sigui bisa Moises: ‘Traha un palangana di bròns ku su pedestal di bròns. Pon'é entre e tènt di enkuentro ku e altá i yen'é ku awa.

¹⁹Aaron i su yunan mester saka awa eifó pa nan laba man i pia.

²⁰Nan mester laba man ku pia ora nan bini tènt di enkuentro, òf ora nan aserká e altá pa hasi nan trabou i ofresé un sakrifisio di kuminda na Mi.

²¹Nan mester laba man ku pia pa nan no muri. Ta un regla permanente pa Aaron i su desendientenan.’

²²SEÑOR a bisa Moises:

²³‘Buska e mihó spesereinan: sinku kilo di mira di mihó kalidat, dos kilo i mei di kané aromátiko, dos kilo i mei di kaña aromátiko,

²⁴sinku kilo di flor seku di mata di kané, segun e unidat di peso ku ta usa den santuario; tambe kuater liter di zeta di oleifi.

²⁵Bruha tur huntu i traha un zeta sagrado; trah'é manera un trahadó di perfume ta traha perfume.

²⁶Hunta e zeta akí na e tènt di enkuentro, na e arka ku tin e dokumento di aliansa aden,

²⁷na e mesa ku tur su rekisitonan, na e kandelar ku tur loke ta pertenesé n'e, na e altá pa ofresé sensia,

²⁸na e altá pa sakrifisio di kandela ku tur loke ta pertenesé n'e i na e palangana ku su pedestal.

²⁹Asin'ei bo ta konsagrá nan na Mi, nan ta bira mashá sagrado. Ken ku mishi ku nan lo ta sagrado.

³⁰Hunta i konsagrá Aaron i su yunan tambe ku e zeta pa nan ta mi saserdote.

³¹Bisa e israelitanan ku e zeta di konsagrashon akí ta sagrado i ku e ta keda sagrado pa Mi di generashon pa generashon.

³²No prepará nada pa boso mes segun e resèt ei ni bash'é riba kurpa di un hende ku no ta saserdote. E ta algu sagrado, respet'é komo tal.

³³Mester saka for di komunidat di Israel e hende ku traha algu segun e resèt ei i us'é riba un hende ku no ta saserdote.’

³⁴SEÑOR a sigui bisa Moises: ‘Buska e siguiente spesereinan ku ta hole dushi: bálsamo, óniks, galbano, i sensia puru. Di tur e mesun kantidat.

³⁵Bruha tur kos huntu i traha sensia manera un trahadó di perfume ta traha perfume. Pone salu aden; e mester ta puru i sagrado.

³⁶Mula un parti fini fini i pone un tiki dilanti di e arka di aliansa den tènt di enkuentro, kaminda lo Mi topa ku bo. Mester ta algu mashá sagrado pa boso.

³⁷No prepará nada pa boso segun e resèt ei. Respet'é komo algu reservá pa Ami, SEÑOR.

³⁸Si un hende traha algu meskos asina pa e mes gosa di e holó, mester elimin'é for di komunidat di Israel.’