Read Papiamento Éksodo 31 Bible Online

Éksodo 31 - Papiamento bible

Éksodo 31

¹SEÑOR a bisa Moises:

²‘Tende, Mi a skohe Besalel, yu di Uri i ñetu di Hur, di tribu di Huda.

³Mi a yen'é ku mi spiritu, Mi a dun'é sabiduria, konosementu i abilidat pa tur tipo di trabou,

⁴pa diseñá i traha diseño den oro, den plata i den bròns;

⁵pa sleip i monta piedra presioso, pa traha ku palu i hasi tur sorto di trabou fini.

⁶Tambe Mi a skohe Oholiab, yu di Ahisamak, di tribu di Dan, pa e yuda Besalel ku e trabou. E otro trahadónan tambe Mi a duna hopi abilidat pa realisá tur loke Mi a ordená bo:

⁷e tènt di enkuentro, e arka pa warda e dokumento di aliansa, e tapadera di e arka i tur otro opheto den tènt;

⁸e mesa ku su rekisitonan, e kandelar di oro puru ku tur loke ta pertenesé n'e; e altá pa ofresé sensia;

⁹e altá pa sakrifisio di kandela i tur loke ta pertenesé n'e; e palangana ku su pedestal;

¹⁰e pañanan saserdotal pa bisti den santuario, tantu e pañanan sagrado di saserdote Aaron komo di su yunan;

¹¹e zeta di konsagrashon i e sensia perfumá pa santuario. Nan mester traha tur kos manera Mi a ordená bo.’

¹²SEÑOR a bisa Moises:

¹³‘Bisa e israelitanan ku nan mester respetá mi dianan di sabat, pasobra sabat ta un señal entre Ami ku boso di generashon pa generashon, pa boso sa ku t'Ami a skohe boso komo mi pueblo.

¹⁴Respetá dia di sabat pasobra e ta un dia konsagrá na Mi. Esun ku no respet'é ta haña kastigu di morto, pasobra ken ku traha e dia ei, ta keda eliminá for di su pueblo.

¹⁵Seis dia bo tin pa traha, pero e di shete dia ta un dia di sosiegu kompleto, un dia konsagrá na SEÑOR. Ken ku traha riba dia di sabat ta haña kastigu di morto.

¹⁶E israelitanan mester keda selebrá dia di sabat. Ta un determinashon den e aliansa ku ta konta pa semper, pa nan i nan desendientenan.

¹⁷Ta un señal di e laso entre Ami ku e israelitanan pa semper. Pasobra den seis dia Ami, SEÑOR, a traha shelu i tera i riba e di shete dia Mi a sosegá pa kohe un rosea.’

¹⁸Ora Dios a kaba di papia ku Moises riba Seru Sinai, Dios a dun'é e dokumento di aliansa, dos tabla di piedra, ku Dios mes mes a skibi.