Read Papiamento Éksodo 35 Bible Online

Éksodo 35 - Papiamento bible

Éksodo 35

¹Moises a yama tur e israelitanan huntu i bisa nan: ‘Ata e mandamentunan ku SEÑOR a duna pa boso kumpli ku nan:

²Tin seis dia pa traha, pero e di shete dia ta un dia sagrado pa boso; un dia di sosiegu kompleto, dediká na SEÑOR. Ken ku traha riba e dia ei, ta haña kastigu di morto.

³Riba e dia ei ningun hende no mag sende kandela den su kas.’

⁴Moises a sigui papia ku e israelitanan: ‘SEÑOR a ordená pa for di boso propiedat boso hasi un donashon p'E. Kada hende ta duna SEÑOR segun su kurason ta mand'é: oro, plata, bròns,

⁶lana blou, kòrá püs i kòrá bibu, lenen fini, lana di kabritu,

⁷kueru di chubatu di karné tinzjí kòrá, kueru fini, palu di akasia,

⁸zeta pa lampi, speserei pa traha zeta di konsagrashon i sensia di holó dushi,

⁹óniks i otro piedra presioso pa e frèskòt saserdotal i e pechero.

¹⁰E hòmbernan di fishi entre boso mester traha loke SEÑOR a ordená:

¹¹e santuario, e tènt ku e kueru pa tap'é, su haknan i su tablanan, su baranan, su pilánan i su pianan,

¹²e arka di aliansa i su baranan, e tapa di arka i e kortina ku ta tene e arka for di bista,

¹³e mesa ku su baranan, tur loke ta pertenesé n'e i e pan konsagrá,

¹⁴e kandelar ku tur loke ta pertenesé n'e, su lampinan ku nan zeta,

¹⁵e altá pa ofresé sensia ku su baranan, e zeta pa konsagrashon i e sensia di holó dushi, e kortina na entrada di tènt di enkuentro,

¹⁶e altá pa sakrifisio di kandela, ku su hèkwèrk fini di bròns, su baranan i tur loke ta pertenesé n'e, e palangana ku su pedestal,

¹⁷e kortinanan rondó di e plenchi, e pilánan ku nan pianan i e kortina na entrada di e plenchi,

¹⁸e pènchinan di e tènt i di e plenchi ku nan kabuyanan

¹⁹i e pañanan saserdotal pa ora di sirbishi den e santuario, paña pa Aaron ku su yunan.’

²⁰E ora ei e israelitanan a bai laga Moises.

²¹Ora nan a bolbe, nan a duna loke nan kurason a inspirá nan duna SEÑOR pa trabou di konstrukshon di e tènt di enkuentro, pa tur loke tin mester pa sirbishi i tambe pa e pañanan saserdotal.

²²Hòmber i muhé a trese loke nan ker a duna boluntariamente: bròsh, renchi di orea, renchi ku seyo, kadena i tur otro opheto di oro.

²³Tambe kada hende a duna loke e tabatin: lana blou, kòrá püs i kòrá bibu, lenen fini, lana di kabritu, kueru di chubatu di karné tinzjí kòrá i kueru fini.

²⁴Esnan ku ker a duna algu di plata òf di bròns a tres'é pa SEÑOR. Esnan ku tabatin palu di akasia ku por a usa pa e trabou, a tres'é.

²⁵Tur e muhénan ku tabata bon den trahamentu di hilu, a trese loke nan a traha: lana blou, kòrá püs i kòrá bibu, i lenen fini.

²⁶Tur otro muhé, di kurason, tabata dispuesto na traha hilu ku lana di kabritu.

²⁷E lidernan a trese óniks i otro piedra presioso pa e frèskòt saserdotal i e pechero.

²⁸Tambe nan a trese speserei i zeta pa lampi, zeta di konsagrashon i pa traha sensia di holó dushi.

²⁹Boluntariamente tur hòmber i muhé israelita a hasi nan donashon pa e trabou ku Moises a ordená nan hasi den nòmber di SEÑOR.

³⁰Moises a bisa e israelitanan: ‘SEÑOR a skohe Besalel, yu di Uri, ñetu di Hur, di tribu di Huda.

³¹Dios a yen'é ku su spiritu, ku sabiduria, konosementu i abilidat pa tur tipo di trabou:

³²pa diseñá i traha e diseñonan ei na oro, na plata i na bròns,

³³pa sleip i monta piedra presioso, pa traha ku palu i traha tur loke el a diseñá.

³⁴SEÑOR a duna é i Oholiab, yu di Ahisamak, di tribu di Dan, e don pa pasa loke nan sa pa otro.

³⁵SEÑOR a duna nan kapasidat grandi pa traha trabou di fishi, pa diseñá i pa tehe tela di hopi koló den lenen fini i den lana blou, kòrá püs i kòrá bibu. Nan por a traha tur e trabounan ei i diseñá nan.