Read Papiamento Éksodo 38 Bible Online

Éksodo 38 - Papiamento bible

Éksodo 38

¹Besalel a traha e altá pa sakrifisio di kandela firkant i di palu di akasia. E altá tabata dos meter i mei hanchu, dos meter i mei largu i un meter i mei altu.

²El a traha un kachu na e kuater skinanan, tur na ún ku e altá, i a fura e altá ku bròns.

³El a traha di bròns tur e ophetonan ku tabata nesesario na altá, esta e bakinan, e skèpnan, e skalchinan di ofrenda, e fòrkinan i e panchinan di kandela.

⁴Tambe el a traha un hèkwèrk fini di bròns i a peg'é rònt na e parti abou di e altá. E hèkwèrk tabata yega te na e leshi ku tabatin na mitar altura rònt di e altá.

⁵Na kada un di e kuater skinanan di e hèkwèrk fini di bròns, el a traha un renchi pa por pasa e baranan pa karga e altá.

⁶Besalel a traha e baranan di palu di akasia i a fura nan ku bròns.

⁷El a pasa e baranan den e renchinan na kada banda di e altá, pa por a transport'é. E altá tabata trahá di tabla; di paden e tabata hòl.

⁸El a traha e palangana ku su pedestal di bròns. Pa hasi esei el a usa spil[19] di bròns di e muhénan ku tabata sirbi na entrada di e tènt di enkuentro.

⁹Besalel a traha e plenchi rondó di e santuario. El a sera e plenchi na banda zùit ku un kortina di sinkuenta meter largu. E kortina tabata di lenen fini trahá di hilu trosé den otro.

¹⁰Pa e kortina tabatin binti pilá di palu i binti pia di bròns; ku hak i bara di plata.

¹¹Meskos na parti nort: sinkuenta meter di kortina, binti pilá di palu i binti pia di bròns; ku hak i bara di plata.

¹²Na parti wèst el a usa bintisinku meter di kortina, dies pilá i dies pia; ku hak i bara di plata.

¹³Na parti ost el a usa bintisinku meter di kortina.

¹⁴El a usa pa kada banda di e entrada shete meter i mei di kortina ku tres pilá i tres pia.

¹⁶Tur kortina rondó di e plenchi tabata di lenen fini, trahá ku hilu trosé den otro.

¹⁷E pianan pa e pilánan tabata di bròns. E haknan i e baranan tabata di plata i e parti ariba di e pilánan tabata furá ku plata. Bara di plata tabata konektá e pilánan rònt di e plenchi ku otro.

¹⁸Na entrada di e plenchi tabatin un kortina di lana blou, kòrá püs i kòrá bibu i di lenen fini, trahá ku hilu trosé den otro, bunita bòrdá ku hilu di diferente koló. E kortina tabata dies meter largu i sinku meter altu meskos ku e kortinanan rondó di e plenchi.

¹⁹Tabatin kuater pilá i kuater pia di bròns; e haknan, e partinan ariba di e pilánan i e baranan tabata furá ku plata.

²⁰Tur e pènchinan di e tènt i di e plenchi tabata di bròns.

²¹Riba òrdu di Moises i bou di guia di Itamar, yu di saserdote Aaron, e levitanan a kalkulá gastu di e tènt di enkuentro.

²²Besalel, yu di Uri i ñetu di Hur for di tribu di Huda, a traha tur kos manera SEÑOR a ordená Moises.

²³Oholiab, yu di Ahisamak for di tribu di Dan, a yud'é. Oholiab tabata un hòmber di fishi, un diseñadó, i un hòmber ku por a tehe tela di hopi koló den lenen fini i den lana blou, kòrá püs i kòrá bibu.

²⁴Pa konstrukshon di e tènt di enkuentro e hendenan a duna boluntariamente e siguiente kantidat di oro: 877 kilo i 300 gram segun norma bálido den santuario.

²⁵E plata ku nan a rekohé serka e hendenan ku tabata registrá den e komunidat a monta 3017 kilo i 750 gram, segun norma bálido den santuario.

²⁶Tur hende hòmber for di binti aña bai ariba ku tabata inskribí, a paga sinku gram di plata i en total a inskribí 603.550 hòmber.

²⁷Pa e pianan di e tènt di enkuentro i di e kortina ku ta tene e lugá kaminda e arka di aliansa ta for di bista a usa 3000 kilo di plata. Pa kada un di e shen pianan tabatin mester di 30 kilo.

²⁸Di e 17 kilo i 750 gram ku a sobra Besalel a fura e parti ariba di e pilánan i a traha e haknan i baranan pa e pilánan.

²⁹E hendenan a duna boluntariamente 2124 kilo di bròns.

³⁰Di e bròns akí nan a traha e pianan pa entrada di e tènt di enkuentro, e altá ku su hèkwèrk fini di bròns i tur loke ta pertenesé n'e,

³¹tur pia pa e plenchi i pa e entrada i finalmente tur e pènchinan pa e tènt i pa e plenchi.