Read Papiamento Éksodo 4 Bible Online

Éksodo 4 - Papiamento bible

Éksodo 4

¹‘Pero si nan no ke kere mi,’ Moises a kontradesí SEÑOR. ‘Si nan no ke skucha mi? Suponé ku nan bisa ku Bo no a aparesé na mi.’

²E ora ei SEÑOR a puntra Moises: ‘Kiko bo tin ei den bo man?’ ‘Un bastòn,’ Moises a kontestá.

³SEÑOR a orden'é: ‘Tir'é abou.’ Ora Moises a tir'é abou, el a bira un kolebra. Lihé Moises a bula atras.

⁴Pero SEÑOR a bis'é: ‘Kohe e kolebra na su rabu.’ Moises a koh'é tene i e kolebra a bolbe bira un bastòn.

⁵SEÑOR a bisa: ‘Esaki ta pa nan kere ku Ami, Dios di nan antepasadonan, Dios di Abraham, Isak i Yakob a aparesé na bo.’

⁶Tambe SEÑOR a bisa Moises: ‘Hinka bo man den bo bus.’ Moises a hasi asina, pero ora el a saka su man atrobe...ata. E man tabata na lepra, e tabata blanku blanku.

⁷‘Bolbe hinka bo man den bo bus,’ SEÑOR a bisa. Pa di dos bia Moises a hinka su man den su bus i ora el a sak'é, e tabata normal atrobe.

⁸SEÑOR a bisa: ‘Si nan no kere bo i no laga e promé milager konvensé nan, e di dos sí mester konvensé nan.

⁹Pero si ningun di e dos milagernan akí no konvensé nan i nan keda sin skucha bo, saka poko awa for di riu Nilo i bash'é riba suela i e awa lo bira sanger.’

¹⁰E ora ei Moises a bisa: ‘No tuma mi na malu, Señor, nunka mi no tabatin e don di papia bon. No ta kos di awor, asta awor ku Bo ta papia ku mi, nada no a kambia. Ta haña mi no por haña palabra.’

¹¹Pero SEÑOR a kontestá: ‘Ken a duna hende boka pa papia? No t'Ami SEÑOR, ta Esun ku ta hasi hende muda, surdu, siegu, òf laga nan weta?

¹²P'esei bai, lo Mi yuda bo ora bo ta papia i instruí bo loke bo tin ku bisa.’

¹³Pero Moises a bisa: ‘No tuma mi na malu, Señor, manda un otro hende, no!’

¹⁴E ora ei SEÑOR a rabia ku Moises i a bis'é: ‘Bo no tin un ruman, e levita Aaron? Mi sa ku e sí por papia bon. E ta na kaminda pa bin topa bo i lo ta kontentu di mira bo.

¹⁵Papia kuné, bis'é loke e tin ku bisa. Mi mes lo yuda boso haña e palabranan adekuá i splika boso loke boso tin ku hasi.

¹⁶Aaron lo papia ku e pueblo den bo nòmber. E lo hiba palabra pa bo i abo lo ta manera Dios p'e.

¹⁷Bai ku e bastòn akí, pasobra kuné bo mester hasi e milagernan.’

¹⁸Moises a bai bèk serka su suegu Yitro i bis'é: ‘Mi tin gana di bai Egipto bèk pa mira ku mi hendenan ta na bida.’ ‘Bai na pas,’ Yitro a kontestá.

¹⁹Na Midian ya SEÑOR a bisa Moises: ‘Bai Egipto bèk, pasobra e hendenan ku ker a mata bo a muri.’

²⁰Moises a laga su kasá i su yu hòmbernan subi buriku bai Egipto. El a bai ku e bastòn, manera Dios a orden'é.

²¹SEÑOR a bisa Moises: ‘Awor ku bo ta bai Egipto bèk, sòru pa dilanti di fárao bo hasi tur e milagernan ku Mi a duna bo poder pa hasi. Sinembargo lo Mi sòru pa e keda tèrko i no laga e israelitanan bai.

²²Bis'é e ora ei ku esaki ta loke SEÑOR ta bisa: “Israel ta mi yu hòmber mayó.

²³Mi a ordená bo pa laga mi yu hòmber bai pa e adorá Mi, pero bo a nenga. P'esei lo Mi mata bo yu hòmber mayó.” ’

²⁴Na kaminda, na un lugá kaminda Moises tabata bai pasa nochi, SEÑOR a bai riba dje i ker a mat'é.

²⁵Su kasá Sipora a kohe un kuchú trahá di piedra i a hasi sirkunsishon ku su yu, i ku e pida kueru ku el a kòrta el a mishi ku pianan di Moises i bisa: ‘Pa medio di sanger so mi por a keda ku bo komo kasá.’

²⁶El a bisa esaki ku bista riba e sirkunsishon. E ora ei SEÑOR a laga Moises na pas.

²⁷SEÑOR a bisa Aaron pa e bai topa ku Moises den desierto. Aaron a topa Moises na e seru di Dios i a bras'é.

²⁸Moises a konta Aaron tur loke SEÑOR a orden'é bisa na Egipto i a kont'é di tur e señalnan ku e mester hasi.

²⁹Despues nan dos a bai Egipto i aya nan a reuní tur e lidernan di Israel.

³⁰Aaron a konta nan tur loke SEÑOR a papia ku Moises i el a hasi e milagernan pa e pueblo weta.

³¹E pueblo a kere nan. Ora nan a tende ku SEÑOR a weta nan sufrimentu i ku El a kai na nan pena, nan a hinka rudia i ador'É.