Read Papiamento Éksodo 40 Bible Online

Éksodo 40 - Papiamento bible

Éksodo 40

¹SEÑOR a bisa Moises:

²‘Lanta e tènt sagrado, e tènt di enkuentro, riba promé dia di e promé luna.

³Pone e arka di aliansa den dje i ten'é ku e kortina for di bista.

⁴Pone e mesa, i nèchi riba e mesa tur loke mester ta riba dje. Pone e kandelar tambe ku su lampinan.

⁵Pone e altá di oro pa ofresé sensia dilanti di e arka, kologá e kortina na entrada di e tènt di enkuentro.

⁶Pone e altá pa sakrifisio di kandela dilanti di entrada di e tènt sagrado, e tènt di enkuentro.

⁷Pone e palangana entre e tènt di enkuentro ku e altá i yen'é ku awa.

⁸Lanta e pilánan di palu ku e kortinanan di lenen fini pa sera e plenchi rondó di e tènt di enkuentro i kologá e kortina di lana na entrada di e plenchi.

⁹Despues hunta e tènt i tur kos ku ta aden ku zeta pa konsagr'é. Asina e ta bira un tènt sagrado.

¹⁰Hunta e altá pa sakrifisio di kandela i tur loke ta pertenesé n'e tambe ku zeta pa konsagr'é i asina e altá ta bira mashá sagrado.

¹¹Hunta i konsagrá e palangana i su pedestal tambe.

¹²Laga Aaron i su yu hòmbernan bini na entrada di e tènt di enkuentro i purifiká nan ku awa.

¹³Bisti Aaron e pañanan saserdotal i hunt'é ku zeta; asina e ta konsagrá i por traha pa Mi komo saserdote.

¹⁴Laga su yunan tambe bini serka bo, bisti nan e toga saserdotal

¹⁵i hunta nan ku zeta meskos ku bo a hunta nan tata. E ora ei nan por traha pa Mi komo saserdote. E unshon akí ta indiká ku nan i nan desendientenan lo ta saserdote pa semper.’

¹⁶Moises a hasi tur kos manera SEÑOR a orden'é.

¹⁷Riba promé dia di e promé luna den e di dos aña despues di a sali for di Egipto Moises a lanta e tènt sagrado.

¹⁸El a pone e pianan, lanta e tablanan, pega e balkinan haks na e tablanan i a pone e pilánan.

¹⁹El a habri un tènt riba e tènt di enkuentro i riba esaki e kueru pa tapa e tènt, manera SEÑOR a orden'é.

²⁰Despues Moises a pone e tablanan di piedra den e arka di aliansa, pone e baranan na e arka, tap'é ku e tapa

²¹i hib'é den e tènt. Moises a kologá e kortina di lana bunita bòrdá pa tene e arka di aliansa for di bista, manera SEÑOR a orden'é.

²²Parti pafó di e kortina ei el a pone e mesa den e tènt di enkuentro na parti nort di e tènt.

²³Riba dje el a pone e pan sagrado nèchi, dilanti di SEÑOR, manera SEÑOR a orden'é.

²⁴El a pone e kandelar den e tènt di enkuentro, enfrente di e mesa parti zùit di e tènt.

²⁵El a pone e lampinan riba dje dilanti di SEÑOR, manera SEÑOR a orden'é.

²⁶El a pone e altá di oro den e tènt di enkuentro dilanti di e kortina di lana bunita bòrdá.

²⁷El a kima sensia di holó dushi riba dje, manera SEÑOR a orden'é.

²⁸El a kologá e kortina na entrada di e tènt sagrado.

²⁹El a pone e altá pa sakrifisio di kandela na entrada di e tènt sagrado, e tènt di enkuentro, i a ofresé riba dje sakrifisio di kandela i sakrifisio vegetal, manera SEÑOR a orden'é.

³⁰El a pone e palangana entre e tènt di enkuentro i e altá i a yen'é ku awa.

³¹Moises mes, Aaron, i e yunan di Aaron tabata laba nan man i nan pia ku e awa ei

³²promé ku nan drenta e tènt di enkuentro i ora nan tabata bai na e altá manera SEÑOR a ordená Moises.

³³Rondó di e tènt di enkuentro i e altá Moises a sera e plenchi i kologá e kortina di lana na su entrada. E ora ei Moises a terminá e trabou.

³⁴Na e momento ei e nubia a tapa e tènt di enkuentro i gran splendor di SEÑOR a yena e tènt sagrado.

³⁵Moises no por a drenta e tènt di enkuentro, pasobra e nubia a baha riba e tènt i gran splendor di SEÑOR a yena e tènt sagrado.

³⁶E israelitanan tabata sigui nan biahe solamente ora e nubia tabata alehá su mes for di e tènt.

³⁷Pero si esei no tabata sosodé nan tabata keda kaminda nan tabata.

³⁸Durante henter nan biahe, e israelitanan tabata mira e nubia di SEÑOR riba e tènt den dia i anochi un kandela den e nubia.