Read Papiamento Job 13 Bible Online

Job 13 - Papiamento bible

Job 13

¹Komprondé mi bon, tur loke mi a papia, ta mi mes wowo a mira, mi mes orea a tende i mi a komprondé tur kos bon kla.

²Loke boso sa, mi tambe sa; mi no ta inferior na boso.

³Pero mi ke papia ku Dios Todopoderoso, mi ke pleita mi kaso karakara kunÉ.

⁴Sinembargo boso ke blancha mi ku mentira; boso tur ta manera dòkter, ku no por kura hende.

⁵Mare boso por sera boso boka! Maske t'asina boso por demostrá sabiduria.

⁶Paga tinu kon mi ta bai pleita mi kaso, kon mi ta bai defendé mi mes.

⁷No kere ku boso ta yuda Dios o sirbiÉ ora boso ta gaña hende i kohe nan kabes abou.

⁸Boso ke tuma parti pa Dios, boso ke boga p'E?

⁹Ora E skrudiñá boso, boso lo por pasa e prueba? Boso ta kere ku boso por nèk Dios, manera ta nèk hende?

¹⁰E ta skual boso sigur, manera dos be dos ta kuater, si boso tuma parti p'E, akusando ami inhustamente.

¹¹Akaso boso no tin temor di Dios su mahestat, no ta drenta boso un miedu pa su poder?

¹²Loke boso ta insistí ku mi mester aseptá, lo para bira palabra bashí, loke boso ta papia lo resultá palabra fofo.

¹³Hala un banda i keda ketu! Laga mi papia ku Dios, kon ku para keda!

¹⁴Podisé boso ta pensa: di kon mi ta bai riska mi bida, pakiko mi ta bai te final.

¹⁵Bon, suponé ku E mata mi, ku mi no tin niun chèns, tòg mi[11] ke bai defendé mi inosensia personalmente serka djE.

¹⁶I ata mi konsuelo akí: Hende sin Dios no ta tribi aserk'É.

¹⁷Skucha mi palabranan ku atenshon, habri boso orea!

¹⁸Boso por konta ku mi a prepará mi kaso; mi tin sigur ku mi inosensia ta keda probá.

¹⁹Ken por trese argumentonan sano kontra mi? Si mi no tin rason, mi ta dispuesto na keda ku mi boka será, te dia mi hala mi delaster rosea.

²⁰Si bo konsedé mi dos petishon, mi ta presentá bo dilanti, Dios.

²¹Na promé lugá: stòp di kastigá mi i na di dos lugá: stòp di spanta mi.

²²Papia Abo promé, o Dios, i ami lo rospondé, sino laga ami papia i Abo rospondé mi.

²³Bisa mi: kuantu bia mi a peka kontra Bo? Mustra mi: kua ta mi ofensa i piká?

²⁴Pakiko Bo ta trata mi asina seku antó? Pakiko Bo ke yòp ami, Job, benta leu?

²⁵Mi ta djis un blachi ku a kai fo'i palu, un sprichi di yerba seku. Pakiko bo ta sigui yena spantu den mi kurpa; pakiko Bo ta sigui persiguí mi?

²⁶Bo ta lansa akusashonnan kontra mi, ku ta amargá mi bida. Parse ku bo ta pidi mi kuenta i rason pa pikánan di mi hubentut.

²⁷Bo ta mara mi pia na blòki; vigilá kada stap ku mi dal, asta rastro di mi pia Bo ta listra.

²⁸I tur esei Bo ta hasi ku un hende ku ta garna manera kos putrí, ta gasta manera paña ku mòt a kome.