Read Papiamento Job 14 Bible Online

Job 14 - Papiamento bible

Job 14

¹Hende ku muhé a pari, ta hiba un bida kòrtiku yen di angustia i tristesa,

²e ta habri manera un flor, pa djis despues e marchitá; su bida ta kore pasa manera sombra pasahero.

³Mi no por biba kere ku ta un hende asina Bo ta tene na bista, Bo ta pone Bo dilanti pa husga.

⁴Ken por saka algu puru for di loke ta impuru? Niun hende!

⁵Unabes ku dianan di hende ta determiná, ku Bo a dekretá e kantidat di luna ku l'e biba i ku Bo a fiha un límite ku e no por surpasá,

⁶kita bo bista fo'i dje i lag'é trankil, pa e por gosa na fin di su dia, manera un trahadó ku ta kobra pa dia.

⁷Pa un palu ku nan kap tin speransa. E por bolbe biba, saka spreit.

⁸Maske su rais bira bieu den tera, su tronkon putri den hundu abou ayá,

⁹asina e sinti holó di awa, e ta spreit i tira brasa, manera un planchi yòn.

¹⁰Pero hende ta pèrdè tur su forsa, ora e muri; ora e hala su delaster rosea, unda e ta bai?

¹¹Manera awa di laman ta evaporá i un riu ta seka seku seku,

¹²asina tambe hende ta kai drumi sin lanta mas. Miéntras shelu ta eksistí lo e no spièrta ni lanta for dje soño ei.

¹³Mare Bo por a skonde mi den reino di morto tene mi bon wardá, te dia bo rabia baha. Pa ora e momento ei yega, Bo bolbe buska mi drechi.

¹⁴Si hende por bolbe biba despues di morto ami ta dispuesto pa warda, maske kon mizerabel mi bida ta.

¹⁵E dia ei lo Bo yama mi i lo mi rospondé, lo Bo bolbe sinti gana di mira mi, obra di bo man.

¹⁶Lo Bo sigui mi pasonan, sin konta mi pikánan;

¹⁷lo Bo ta dispuesto pa skonde nan den un saku i pa blancha mi faltanan ku kalki.

¹⁸Pero manera un seru ta eroshoná i garna, manera un baranka ta lòs fo'i su lugá,

¹⁹manera awa ta sleip piedra i lawin'i awa ta laba tera bai kuné, asin'ei Abo ta kaba ku speransa di hende.

²⁰Bo ta propin'é e gòlpi mortal i e no t'ei mas; Bo ta kambia su kara, mand'é baha pa sawaka.

²¹Si su yunan haña fama, e no ta sa; si nan resultá hende sin balor, tampoko e no ta sa.

²²Doló di su mes kurpa, sufrimentu di su propio ser, t'esei so e ta sinti.’