Read Papiamento Job 15 Bible Online

Job 15 - Papiamento bible

Job 15

¹E ora ei Elifaz di Teman a rospondé:

²‘Job, akaso un hòmber ku sabiduria ta ras pa loko, i ta iritá hende manera bientu kayente di ost?

³Niun hende sabí no ta argumentá ku palabra bashí, ku diskursonan sin balor.

⁴Pero abo ta hasi pió ainda, bo tin menoskousa pa temor di Dios i ta bagatelisá deboshon p'E.

⁵Bo piká ta hinka palabra den bo boka i bo lenga ta bira di kolebra.

⁶P'esei no ta mi boka, ma esun di bo mes ta bo kondena; bo propio lepnan ta testiguá kontra bo.

⁷Akaso bo ta pensa ku t'abo ta e promé ser humano, esun di mas ansiano i sabí, nasé promé ku serunan a haña un lugá?

⁸Bo tin privilegio pa presensiá seshonnan ku Dios ta tene? Bo ta kere ku t'abo ta e úniko hende ku sabiduria na mundu?

⁹Ki konosementu abo tin ku nos sí no tin? Ki komprondementu abo ta poseé ku nos sí no por yega n'e?

¹⁰Hende bieu kabei blanku, asta mas bieu ku bo propio tata, ta na nos banda.

¹¹Pakiko antó bo ta rechasá palabra, papiá suavemente ku bo? Bo no ta satisfecho ku ta Dios mes ke konsolá bo?

¹²Pakiko bo ta pèrdè kòntròl i bo wowonan ta chispa kandela,

¹³di manera ku bo ta ventilá bo rabia kontra Dios i ta skupi sorto di palabra asina fo'i bo boka?

¹⁴Akaso hende por ta perfekto, un mortal por ta korekto den tur kos?

¹⁵Si Dios no ta konfia ni esnan, konstantemente den su presensia, si shelu mes no ta kompletamente puru den su bista,

¹⁶ki ta para antó pa hende, baho i korupto, ku ta hasi malu manera nada.

¹⁷Skucha mi, mi ke splika bo algu; laga mi konta bo loke mi a mira,

¹⁸loke sabínan mes a deklará, sin tene nada skondí, di loke nan a risibí di nan antepasadonan,

¹⁹ku a haña e tera pa nan so; sin ku mal influensia strañero a alehá nan di SEÑOR.

²⁰Un hende perverso ta sinti su mes agitá, dia aden dia afó, un burdugu asina ta biba henter su bida tormentá.

²¹Su oreanan ta tende hopi zonido spantoso; ora e kere ku tur kos ta bayendo bon, ata desgrasia pisá riba dje!

²²E no tin niun tiki speransa pa skapa di skuridat, destiná e ta pa muri morto di spada.

²³E ta kana dualu, buskando enbano kon satisfasé su hamber, Den su kurason e sa ku t'e mes ta kousa di su propio ruina.

²⁴Ansha i angustia ta domin'é, pone su kurpa sakudí di teror; nan ta basha bini riba dje manera un rei, kla pa ataká i disididu pa kanta viktoria,

²⁵pasobra el a hisa man pa Dios i a hunga wapu dilanti di Dios Todopoderoso.

²⁶El a ranka sali kontra Dios, ku kuèrdè di garganta ireis, tras di un eskudo bon reforsá.

²⁷Ounke su kara ta gordo, yen di vèt i su barika ta bòltu di gordura,

²⁸ounke el a logra rekonstruí siudatnan ku SEÑOR a ruina i a logra biba den kasnan, destiná pa keda deshabitá,

²⁹e no ta keda riku, su rikesa no ta perdurá, ni su propiedatnan no ta oumentá den e pais.

³⁰E no ta skapa di skuridat di morto; lo e ta manera palu, ku su spreitnan ta kima den kandela i rosea di Dios ta supla manda leu.

³¹Mihó e n' gaña su mes konfiando den loke ta vanidat, pasobra e no ta haña nada pa rekompensa.

³²E ta pashimá promé ku tempu, su ramanan no ta bira bèrdè.

³³Lo e ta manera mata di wendrùif, ku ta pèrdè su drùifnan promé ku nan hecha i manera palu di oleifi ku ta basha tur su flornan abou.

³⁴Pasobra tur esnan ku no ta konfia den Dios lo para kaba na nada i kandela lo kome kas di hende ku ta gusta soborno.

³⁵Nan ta konsebí problema i pari maldat; nan seno ta produsí engaño.’