Read Papiamento Job 18 Bible Online

Job 18 - Papiamento bible

Job 18

¹E ora ei Bildad di Shuag a bolbe tuma palabra:

²‘Ki dia ta yega un fin na blablamentu di hende manera bo? Si bo tabata rasonabel, nos lo por a papia ainda.

³Kiko ta pone hende manera bo pensa ku nos ta buriku bestia?[14]

⁴Bo ta kushi di rabia! Akaso bo ta kere, ku tur kos mester bira kabes abou pia na laria, djis pa komplasé bo; ku Dios mester kita barankanan fo'i nan lugá, djis pa duna bo gustu?

⁵Nò, Job, lus di bida di un mal hende lo paga i manera kandela ku a kaba na nada, e ta para bira friu.

⁶Lo e ta manera un tènt skur, lus pagá i ku lampi kologá na dje, tambe sin klaridat.

⁷Su pasonan vigoroso ta bira insigur, e ta dal abou, víktima di su propio kòmplòt.

⁸Su mes pia ta hib'é bai dònder abou den buraku, e no ta pisa suela firme.

⁹Un klèm ta ten'é na su hilchi, un trampa ta klap sera, peg'é duru aden.

¹⁰A skonde un las p'e riba suela, a arma un trampa den su kaminda.

¹¹E ta sintié menasá unda k'e bira; persiguí kada stap ku e dal.

¹²Hamber ta kaba ku su forsa; kalamidat[15] ta drumi ward'é trompeká.

¹³Fèrmidat, yu mayó di Lamuèrtè, ta kome na su kurpa tikitiki, for di kueru te na wesu.

¹⁴Lamuèrtè ta lastr'é saka for di e hogar, kaminda e tabata biba trankil i ta hib'é bai pon'é te dilanti di hefe dje kompinchinan di morto.

¹⁵Ken ku ta por okupá e kas, ku el a laga atras. Ta basha suafel riba su tereno ya nada no ta krese mas.

¹⁶E ta bira manera un palu, ku ta seka for di su rais den suela te na su ramanan na altu.

¹⁷Niun hende na mundu no ta kòrda mas riba dje, tur hende a lubid'é.

¹⁸A sak'é fo'i lus push'é den skuridat, dester'é for di tera di bibunan.

¹⁹E no ta laga yu atras, ni desendensia i e lugá kaminda e tabata biba a keda kompletamente bandoná.

²⁰Di ost te wèst notisia di su suerte ta kore, tur hende ta konsterná i babuká.

²¹Ata, b'a weta? T'asina hogar di hende ku ta biba sin Dios ta! T'asina lugá di hende ku no ke baha kabes pa Dios ta keda!’