Read Papiamento Job 20 Bible Online

Job 20 - Papiamento bible

Job 20

¹E ora ei Sofar di Naama a rospondé:

²‘Pa motibu di loke mi ta sinti paden, sí, pa mi pensamentunan inkieto, mi ta haña mi obligá di reakshoná.

³Mi mester a sinta soportá pa abo bin siña mi. Bo a insultá mi ku loke b'a trese dilanti. Un hende sensato manera mi ta hañ'é ta rospondé.

⁴Bo n' por laga di sa e kos ei: fo'i tempu bieu, tempu hende ta riba mundu, tabat'asina ku

⁵gritu di alegria di hende malbado, su goso, tur ta bula pasa den un fregá di wowo.

⁶Maske e hende akí ta elevá riba tur hende i su kabes ta yega te den nubia ayá,

⁷lo e para kaba na nada, manera su kakushi ku ta destiná pa kandela. I esnan ku tin kustumber di mira e hende malbado akí lo puntra: “Kiko a para di dje?”

⁸E ta somentá manera un soño, disipá manera un vishon. No por hañ'é.

⁹Ta pèrd'é fo'i bista, su hendenan di kas no ta mir'é nunka mas.

¹⁰E ta muri[16] i su yunan mester pidi hende pober limosna, pa nan por keda na bida.

¹¹E vigor di hubentut, ku tabata parti ainda di su bida, lo baha den graf samsam kuné.

¹²Ounke maldat ta smak dushi den boka dje malbado, i e ta sabori'é bou di su lenga,

¹³ounke ta duru p'e lag'é bai i e ta ten'é pegá na su shel'i boka,

¹⁴tòg e maldat akí lo bira zür den su stoma; lo e ta mes mortal ku venenu di kolebra den su barika.

¹⁵Asin'ei tambe e ta guli rikesa pero mester aroh'é despues; Dios mes lo pèrs e saka for di su kurpa.

¹⁶Ta venenu el a chupa i esei lo mat'é.

¹⁷Lo e no gosa di abundansia di zeta,[17] miel i lechi.

¹⁸Lo e mester debolbé tur loke el a atkerí, entregá su ganashinan, promé ku e por a disfrutá di nan. Lo e no tin probecho di su negoshinan.

¹⁹Tur esaki pasobra el a oprimí hende pober, laga nan sin pariba sin pabou i a konfiská kas, ku e no a traha.

²⁰Nada no ta skapa na man di su ambishon, pasobra semper e ta anhelá mas di loke e tin.

²¹Niun hende no ta skapa di su avarisia, p'esei su prosperidat no ta duradero.

²²Na kumbre di su rikesa ansha ta poderá di dje, doló di kada hende ku el a pone sufri lo basha riba dje.

²³Pa lag'é keda barika yen, Dios lo bira su furia ardiente basha riba dje lag'é penetrá te den su bòfi.

²⁴Si e logra kore bai pa spada, un flecha ta bor'é.

²⁵Ora e ke ranka e flecha saka for di su lomba i e mira kon e punta skèrpi, tur na hal ta sali fo'i su kurpa, e ta kuminsá soda friu.

²⁶El a traha dam warda awa, pero skuridat profundo ta drumi ward'é; kandela, no sendé pa man humano lo kaba ku tur sobrá hende den su kas.

²⁷Shelu lo laga su mal akshonnan sali na kla; mundu lo ta testigu den korte kontra dje i deklará: “Kulpabel bo ta!”

²⁸Un lawin'i awa lo inundá su kas, yobida duru lo lastra tur kos bai kuné, dia Dios den su rabia husga pekadónan.

²⁹T'esei ta loke Dios a destiná pa hende ku hasi maldat; ta esei ta su destino.’