Read Papiamento Job 22 Bible Online

Job 22 - Papiamento bible

Job 22

¹E ora ei Elifaz a bolbe tuma palabra:

²‘Kiko hende por hasi ku ta resultá útil pa Dios? Job, bo ta kere ku asta e hende di mas sabí, por ta útil pa Dios?

³Akaso Dios Todopoderoso tin benefisio, si abo ta un bon hende? Kiko Dios ta gana si bo biba un bida perfekto?

⁴O akaso bo temor p'E ta e motibu, ku E ta hiba bo dilanti di rat?

⁵Nò, ta pasobra bo a hasi asina tantu piká i ta sigui ku nan ketu bai!

⁶Bo a hasi malu di fia bo próhimo sèn i kita nan poseshonnan fo'i nan ora nan no por a paga bo. Asta bo a tuma nan paña fo'i nan, laga nan blo sunú.

⁷Hende morto di hamber i set bo a nenga awa i pan,

⁸ounke bo tabata poderoso, bon pará, doño dje tereno, kaminda bo tabata biba.

⁹Ora biudanan a pidi bo yudansa bo a kore ku nan i bo a maltratá wérfanonan.

¹⁰P'esei awor trampa ta rondoná bo, teror inesperá ta poderá di bo.

¹¹Rònt di bo ta bira skur, bo n' ta ripará? Un lawin'i awa ta inundá bo.

¹²Akaso Dios no ta biba altu den shelu, mas altu ku tur strea leu ayá?

¹³Pero abo ta bisa: “Bon mirá, kiko Dios sa? Su bista por penetrá e nubianan skur pa E por husga?”

¹⁴Bo ta kere ku e nubianan skur ta impediÉ di mira, segun E ta kana na ekstremonan di shelu?

¹⁵Job bo a disidí di sigui e kamindanan bieu, e kamindanan di hende malbado?

¹⁶Hende manera abo ta ranká for di bida promé ku nan tempu, suela ta habri bou di nan,

¹⁷pasobra nan ta bisa Dios: “Hala kita!” òf: “Dios Todopoderoso por mishi ku mi antó?”

¹⁸Nan ta pensa asina, ma ta Dios mes a yena nan kasnan ku kos bon. Ami sí no ta pensa manera nan!

¹⁹Hende hustu ta alegre, hende inosente ta hari aliviá ora nan mira kon e malbado ta haña kastigu.

²⁰Henter propiedat dje hende malbado ta destruí i loke sobra kandela ta kome.

²¹Someté bo na Dios i keda na pas kunÉ; di e manera akí lo bo bolbe haña prosperidat.

²²Laga E instruí bo; graba su siñansa den bo mente.

²³Si bo arepentí i bai bèk serka Dios Todopoderoso lo E restourá bo; Pasobra si bo saka maldat benta leu,

²⁴lòs bo oro for di bo kurason, sí, tambe bo oro di mas fini di Ofir,

²⁵e ora ei Dios Todopoderoso lo bira bo oro, Lo E bira monton di plata pa bo.

²⁶Ku siguransa e ora ei lo bo tin goso den Todopoderoso i lo bo por mir'É ku konfiansa.

²⁷Lo bo resa n'E, l'E skucha bo i abo lo kumpli ku bo promesanan.

²⁸Lo bo tin éksito den tur loke bo hasi, kaminda bo bai semper lo tin klaridat.

²⁹Di eksperensia lo bo por duna otro hende ku ta den sirkunstansianan pisá, konseho, bisando: “Lant'ariba!” Dios lo salba hende humilde.

³⁰SEÑOR lo salba asta un hende ku no ta inosente, pa motibu di bo mannan limpi.’