Read Papiamento Job 23 Bible Online

Job 23 - Papiamento bible

Job 23

¹E ora ei Job a tuma palabra i bisa:

²‘Awor sí mi kana a yena i ta ku hopi esfuerso mi ta dominá mi.

³Ai, mare mi por a haña Dios i yega te den su kas.

⁴Lo mi a splik'É mi kaso i eksponé tur mi argumentonan n'E.

⁵E ora ei lo m'a tende loke E tin di bisa i lo m'a sa kiko E ta pensa.

⁶Durante e diskushon lo E no usa forsa mayor. Nò, pasobra E no por akusá mi di nada tòg.

⁷Aya den su kas, un hende ku a biba segun Dios su boluntat lo por present'É su kaso. Di mes antó ami lo keda liberá di mi hues pa semper.

⁸Mi a buska parti ost, pero Dios no tabat'ei; ora m'a buska parti wèst, mi no a hañ'É.

⁹Ora E ta traha den parti nort, mi no ta mir'É; ora E bira pa zùit mi no ta mira ni su sombra.

¹⁰E sí konosé mi manera di biba. Ora E pone mi na prueba, lo resultá ku mi ta puru manera oro.

¹¹Semper mi a hasi loke Dios a manda, mi a sigui su boluntat, no mi propio deseonan.

¹²Mi no a desviá di su mandamentunan, mi a apresiá kada palabra ku a sali for di su boka mas ku mi pan di kada dia.

¹³Dios ta úniko i niun hende no ta kambia su manera di pensa. E ta hasi loke E ke.

¹⁴E ta kumpli ku loke El a disponé pa mi, i ainda E no ta kla ku mi.

¹⁵P'esei mi tin miedu di enfrent'É; e idea so ya kaba ta laga mi kurpa kohe rel.

¹⁶Dios Todopoderoso a kaba ku mi kurashi.

¹⁷Ta Dios i no e skuridat ku ta rondoná mi, ta yena mi ku miedu.