Read Papiamento Job 27 Bible Online

Job 27 - Papiamento bible

Job 27

¹I Job a sigui ku su diskurso:

²‘Dios kastigá mi si mi ta gaña, e mes Dios ku a impedí mi haña un trato hustu, Esun Todopoderoso ku a amargá mi eksistensia.

³Tanten ku E ta tene mi na bida i laga rosea drenta pa mi nanishi,

⁴niun mentira lo no sali for di mi boka, ni mi lenga lo no pronunsiá nada ku no ta bèrdat.

⁵Mi n' pensa niun ratu so pa duna boso rason; mi ta keda insistí te na mi delaster rosea, ku mi ta inosente.

⁶Lo mi keda para ariba ku mi ta sin falta, ni ún solo dia di mi bida mi no a hasi nada malu nada ku por tira na mi kara.

⁷Mare tur hende ku ta kontra mi i ta mi enemigu, por kontra ku mes destino ku ta toka hende malbado i inhustu.

⁸Ki speransa un hende malbado tin ora Dios kita su bida?

⁹Akaso Dios lo skucha su gritu di ousilio, ora e hañ'é den pèrtá? Sigur ku nò!

¹⁰Un hende malbado no ta gosa alabando Dios Todopoderoso, na ningun momento so e no ta pidi Dios yudansa.

¹¹Mi ta bai siña boso loke e man poderoso di Dios ta hasi; mi ta bai mustra boso plannan di Dios Todopoderoso.

¹²Pero n' ta boso sa tur kos mihó ku tur hende? Pakiko boso a bini ku yen di kos apsurdo antó?

¹³Esaki ta kastigu di Dios Todopoderoso pa hende kruel i malbado:

¹⁴maske e tin hopi yu, nan lo muri den guera o di hamber.

¹⁵Esnan ku keda na bida, pèst lo mata nan i nan biudanan lo no yora nan morto.

¹⁶Ounke hende malbado ta montoná plata manera sushi i tin paña na gran kantidat,

¹⁷ta hende hustu lo bisti loke e malbado a warda ta hende hustu lo keda ku tur su plaka.

¹⁸E kas ku hende malbado traha ta mes frágil ku kas di araña, mes wayangá ku parapete di vitó.

¹⁹E ta kai drumi un hòmber riku,[19] pero ora e habri su wowo e otro dia, tur su rikesa a disparsé.

²⁰Manera lawin'i awa teror ta inund'é, den anochi warwarú ta barié.

²¹Bientu di ost ta his'é, lastr'é bai kuné, rank'é fo'i kaminda e tabata ankrá.

²²E ta supla ku tur su forsa riba dje, i e hende malbado ta hasi tur su posibel pa sali fo'i gara di su poder.

²³E bientu ta manera un persona, ku ta grit'é, ridikulis'é i ta shi e, kore kuné fo'i kaminda e ta.