Read Papiamento Job 29 Bible Online

Job 29 - Papiamento bible

Job 29

¹I Job a bolbe tuma palabra:

²‘Ai, mare tabata manera ántes, tempu Dios tabata protegé mi ainda;

³tempu E tabata iluminá mi ku su lus i mi por a kana trankil den skuridat.

⁴E tempu ei mi tabata den plenitut di mi bida, mi tabata gosa di Dios su amistat i E tabata kuida mi kas i famia.

⁵Dios Todopoderoso tabata huntu ku mi i mi tabatin tur mi yunan serka mi.

⁶Den e tempu ei mi bestianan tabata duna asina tantu lechi, ku mi por a laba mi pianan kuné i zeta tabata kore na abundansia for dje piedranan di mula oleifi.

⁷Ora mi tabata bai porta di siudat pa okupá mi lugá meimei dje ansianonan,

⁸hóbennan tabata kita bai asina nan mira mi i esnan di mas edat tabata lanta para komo muestra di rèspèt pa mi.

⁹Lidernan di pueblo tabata keda ketu, poniendo nan dede dilanti nan boka.

¹⁰E noblenan tabata stòp di papia i nan lenga tabata pega den nan boka.

¹¹Ken ku a tende mi papia tabata gaba mi i esnan ku a mira mi tabatin elogio so pa mi,

¹²pasobra mi tabata sali pa hende pober, ku tabata grita pidi ousilio i mi tabata yuda e mucha sin tata, ku no tabatin niun hende pa yud'é.

¹³E hende ku lo a muri, si no tabata p'ami, tabata bendishoná mi; e yudansa ku mi tabata duna biudanan, tabata yena nan ku alegria.

¹⁴Aktua ku hustisia tabata pa mi manera e paña, ku mi ta pone na mi kurpa tur dia, duna hende nan derecho tabata mi bata i ko'i tapa kabes.

¹⁵Mi tabata wowo pa hende siegu i pia pa hende lam.

¹⁶Mi tabata un tata pa hende den nesesidat; defensor di derecho di strañero.

¹⁷Mi a kibra djente feros di hende malbado i ranka nan víktima saka fo'i nan boka.

¹⁸Mi a pensa: “Lo mi muri trankil den mi propio kas; mi dianan di bida lo ta mes numeroso ku santu di laman.

¹⁹Lo mi ta manera un palu ku su rais ta yega te na awa i serena lo baña mi takinan henter anochi.

²⁰Hende nunka lo no stòp di demostrá mi rèspèt; lo mi mantené mi vigor manera bog ku hende a kaba di span.”

²¹T'ami hende tabata sinta skucha ku atenshon, wardando mi konseho den silensio.

²²Despues ku mi a kaba di papia niun hende no tabatin nada mas pa añadí; nan tabata aseptá mi palabranan, manera tera ta chupa áwaseru.

²³Ku gran anhelo nan tabata spera mi palabranan, manera ta spera áwaseru i nan tabata bebe nan, komo si fuera ta yobida di primavera.

²⁴Ora mi tabata hari ku nan, kasi nan no por a kere, mi kara kontentu tabata enkurashá nan.

²⁵Mi tabata nan lider i mi tabata mustra nan kon biba; mi tabata kana pasa den nan, manera un rei meimei di su trupanan; mi tabata konsoladó di hende den tristesa.