Read Papiamento Job 30 Bible Online

Job 30 - Papiamento bible

Job 30

¹Pero awor ta mucha ta pil di mi, nan tata no ta sirbi ni pa yuda mi kachónan kuida mi karnénan.

²Ki mi por a hasi ku forsa di brasa dje tatanan ei? Ta hende tur krekeché nan tabata!

³Mizeria i hamber a asotá nan na un manera asina teribel, ku den anochi nan tabata kanfuñá rais seku, den mondi será i desolá.

⁴Nan tabata koba saka mata di desierto pa kome; nan tabata asina desesperá, ku te asta rais di mata shimaron tabata nan pan.

⁵Hende ta repudiá nan i ta grita nan, yama nan ladron.

⁶Nan a haña nan fòrsá ta biba den roinan seku, den baranka- i burakunan.

⁷Nan tabata grita manera bestia den mondi i tabata hala bola huntu den beu;

⁸tur tabata poko nùl, hende sin balor; kore a kore ku nan for di pais!

⁹I awor nan yu hòmbernan ta pil di mi den kantika; mi a bira nan ko'i mòrs kuné.

¹⁰Nan ta detestá mi i ta keda leu fo'i mi; ora nan mira mi nan no ta ria pa skupi den mi kara.

¹¹Pasobra Dios a desarmá mi i tormentá mi, nan ta hasi i deshasí den mi presensia.

¹²E trupa ta ataká mi na banda drechi; nan ta pone trampa pa mi pia, nan ta konstruí aparatonan di sitia kontra mi.

¹³Nan ta sera tur mi kamindanan; mi no por hui bai. Nan ta logra destruí mi, sin niun hende para nan.

¹⁴Nan ta ataká mi manera sòldá, ku a kibra muraya pa drenta; asina e muraya a bash'abou, nan tabata kla pa bul'aden.

¹⁵Teror ta poderá di mi; mi dignidat ta disparsé manera ta bientu a supl'é bai kuné, mi trankilidat ta disipá manera nubia.

¹⁶I awor mi ta totalmente abatí; mizeria tin mi konstantemente den su gara.

¹⁷Den anochi sufrimentu ta bora mi wesunan i nan ta kita kai; e doló ku ta kome mi no ta kohe rosea niun ratu.

¹⁸Ku su gran poder Dios ta ranka kita loke ta tapa mi kurpa; E ta dal man tene mi garganta, manera kòl pèrtá.

¹⁹E ta benta mi den lodo, i mi no ta nada mas ku porkeria.

²⁰Mi ta sklama na Bo, o Dios, pero Bo no ta rospondé; mi ta lanta para pa resa, pero Abo ta blo wak mi duru den mi kara.

²¹Bo a bira sin piedat, tur poder ku Bo mannan tin Bo ta usa pa ataká mi.

²²Bo ta hisa pone mi kore riba bientu; Bo ta laga tormenta benta mi p'aki, p'aya.

²³Mi tin sigur ku ta Bo ta mi morto i ta hiba mi na e lugá, kaminda tur hende lo reuní, hende ku awe ainda ta bibu.

²⁴No sa pone man riba un hende derotá, ora den su ansha e ta supliká pa yudansa?

²⁵Akaso mi no a yora pa esnan den problema? Mi kurason no a kibra pa hende pober?

²⁶Ta p'esei mi a spera kos bon, pero ta kos malu a yega; mi a spera lus pero ta skuridat mi a haña.

²⁷Mi ta intrankil, mi no tin pas; ta dianan di tristesa so ta warda mi.

²⁸Mi ta hiba un bida tristu, sin lus di solo; dilanti di tur mi ta pidi yudansa.

²⁹Mi a bira ruman di chakal, kompañero di palabrua; niun hende no ta tende mi gritunan.

³⁰Mi kueru a bira pretu i ta kaska; mi kurpa ta kima di keintura.

³¹Mi lira ta zona tristu, mi flùit ta keha.