Read Papiamento Job 33 Bible Online

Job 33 - Papiamento bible

Job 33

¹Ban mira, Job, skucha mi palabranan i paga tinu na loke mi ta bai bisa.

²Wak, ata mi ta bai habri mi boka; mi palabranan ta na mi punt'i lenga.

³Mi ta papia ku mi kurason den mi man, mi ta bai papia palabra kla.

⁴Spiritu di Dios a krea mi, rosea di Todopoderoso ta duna mi bida.

⁵Wak awor si bo por kontradesí mi; bini ku bo argumentonan i usa nan kontra mi numa.

⁶Mira, abo i ami ta igual den bista di Dios; di klei El a modelá mi tambe.

⁷P'esei bo no mester spanta pa mi, pues mi no ta bai imponé mi outoridat.

⁸Pero kòrda ku bo a bisa mi dilanti — mi a tende bon kla —:

⁹“Mi ta puru i sin piká; mi ta limpi i sin falta.

¹⁰Sinembargo Dios a haña kos pa tira na mi kara, pa konsiderá mi su enemigu.

¹¹E ta mara mi pia na blòki, vigilá tur mi pasonan.”

¹²Pero ami ta bisa bo, Job, ku den e kaso akí bo no tin rason, pasobra Dios ta altu elevá riba hende.

¹³Di kon bo ta akusá Dios, ku E no ta diskutí su kaso ku bo?[22]

¹⁴Dios ta rospondé na mas ku un manera, pero niun hende no ta hasi kaso.

¹⁵Dios por komuniká ku hende den un soño, den un vishon den anochi: ora hende bai un sleim 'i soño pa despues pega un soño profundo.

¹⁶E ora ei E ta revelá hende su boluntat. Loke hende mester hasi o laga di hasi, ta bira kla kla p'e.

¹⁷Esaki ta Dios su manera pa stòp hende di hasi malu i prevenié di bira orguyoso,

¹⁸pa salb'é di graf i wanta su bida pa e no krusa e riu, ku ta hib'é na morto.

¹⁹Kama di malu tambe ta un atvertensia di Dios. Hende ta sinti doló den tur su wesunan,

²⁰kuminda ta tehi e, asta su plato faborito ta wal su stoma.

²¹E no ta sobra karni mas na su kurpa i ta bira kueru riba wesu.

²²E ta na punto di baha pa sawaka, destruktornan ta yam'é bonbiní.

²³Pero si e hende akí tin un angel na su fabor, un di e mílesnan ku ta eksistí, un ku por fungi komo mediadó, i ta mustr'é kon e mester biba,

²⁴un ku ta na grasia kuné i ta bisa: “No lag'é baha den reino di morto, mi a haña reskate p'e,”

²⁵antó e ora ei su kurpa lo bira bunita atrobe, manera di mucha; l'e ta restourá manera den su hubentut.

²⁶Ora e hende akí resa na Dios, e ta agradá Dios, e ta alabá Dios ku gritu di alegria i Dios ta dun'é prosperidat atrobe.

²⁷Kantando e ta deklará pa tur hende tende: “Mi a hasi piká i daña loke tabata bon, pero Dios a spar mi di e sufrimentu, ku mi a meresé.

²⁸El a salba mi di baha den reino di morto i lo mi biba pa gosa di lus.”

²⁹Tur e kosnan akí Dios ta hasi ku hende dos, tres be, sin límite,

³⁰pa bira su alma mand'é bèk for di morada di morto i lag'é gosa di bida.

³¹Paga tinu, Job, i skucha mi; keda ketu i laga mi papia.

³²Pero si bo ke reakshoná, anto rospondé mi! Papia, pasobra mi ke pa bo sali liber!

³³Pero si bo no ke bisa nada, skucha mi antó; keda ketu i ami lo siña bo loke ta sabiduria.’