Read Papiamento Job 35 Bible Online

Job 35 - Papiamento bible

Job 35

¹I Elihu a kontinuá:

²‘Bo ta haña ta korekto i bo ta kere ku Dios mester duna bo rason,

³ora bo puntr'É: “Kuantu asina e malu ku mi ta hasi por ofendé Bo? Kiko mi ta gana ku no hasi malu?”

⁴Mi tin gana di rospondé abo i bo amigunan tambe.

⁵Hisa kara wak shelu, nota e nubianan; nan ta mas altu ku bo!

⁶Bo ta puntra: “Ki diferensia tin pa Dios si mi hasi piká; si mi kometé piká tras di piká, esaki ta ofend'É?”

⁷É no ta gana nada ku e bon o malu ku bo hasi, Job. É no tin niun benefisio di dje.

⁸Ta bo próhimo t'esun ku ta sufri ora abo hasi malu, i t'e tin benefisio ora bo ta hustu.

⁹Bou di peso di opreshon hende ta grita wèl i buska ken lo por salba nan for di man di poderosonan,

¹⁰pero nan no ta buska e Dios, ku a krea nan, ku por pone kantika di speransa den nan kurason den e oranan di mas skur,

¹¹ku ta instruí i siña nan pa medio di bestia rònt di nan i di para den laria.[25]

¹²Hende ta grita pidi ousilio, pasobra hende malbado i orguyoso ta oprimí nan, pero Dios no ta rospondé.

¹³No tin moda di hasi; Dios no ta skucha nan, Todopoderoso no ta ni drei wak nan.

¹⁴Di pursi, Job, bo mes ta bisa, ku bo no ta haña Dios mira, ku E ta laga bo warda, asta awor ku bo kaso ta poné su dilanti.

¹⁵Antó fuera di esei, bo ta bisa tambe: “Dios no ta rabia ni kastigá! E no ta wòri mashá ku piká.”[26]

¹⁶Ta palabra bashí so, Job bo boka ta produsí; bo ignoransia ta yena bo boka ku palabra.’