Read Papiamento Job 36 Bible Online

Job 36 - Papiamento bible

Job 36

¹Elihu a sigui papia:

²‘Karga un poko pasenshi i lo mi instruí bo, pasobra ainda m'a sobra argumento na Dios su fabor.

³Mi ta bai usa mi konosementu amplio pa demostrá ku mi Kreador tin rason.

⁴Bo dilanti bo tin un hòmber, den konosementu hopi vèrsá. Nada mi no ta inventá, esei ta sigur!

⁵Dios ta poderoso, pero E no tin menospresio di nada no tin nada ku E no ta komprondé.

⁶E no ta laga hende malbado na bida i hende oprimí E ta trata ku hustisia.

⁷Hende hustu E ta protegé, hasi nan poderoso manera rei i laga nan haña honor pa semper.

⁸Pero ora hende no tin salida mas, nan keda changá den nan propio mizeria,

⁹Dios ta laga nan realisá e malu ku nan a hasi i e manera ku nan a laga orguyo dominá nan.

¹⁰E ta hala nan atenshon riba su atvertensianan i ta mustra nan ku nan mester arepentí di nan pikánan.

¹¹Si nan obedesé i sirbi Dios, nan lo hiba un bida di pas i prosperidat.

¹²Pero si nan no hasi esei, nan lo muri pa motibu di ignoransia i nan lo krusa e riu ku ta hiba nan reino di morto.

¹³Hende malbado ta keda ku nan rabia i maske kastigá nan, nan no ta resa pidi yudansa.

¹⁴Nan ta muri den flor di nan hubentut; nan bida ta kaba na un manera bergonsoso.

¹⁵Dios ta usa sufrimentu di hende pa salba nan; pa medio di doló E ta pone nan haña komprondementu.

¹⁶Asina tambe Dios lo libra bo fo'i den bok'i kolebra; na lugá di sinti bo anshá, lo bo por hala rosea grandi; bo mesa lo ta yen di kuminda antó pas lo reina.

¹⁷Pero awor bo ta haña tur e kastigu ku otro hende malbado tambe ta haña, Dios a kondená bo pa sufri i lo bo no skapa e kastigu, ku E ta duna bo.

¹⁸Paga tinu pa bo no laga plaka gaña bo ni no laga sèn bou 'i mesa korumpí bo.

¹⁹Bo rikesa no ta sirbi bo pa nada; tur bo influensianan no por yuda bo den e kaso akí.

²⁰No anhelá pa nochi sera, e tempu ku nashonnan lo disparsé diripiente, yega.

²¹Tene kuidou, no bira kara pa maldat, bo a pasa den sufrimentu pa esei tene bo leu for di maldat.

²²Kòrda bon, kon sublime Dios su poder ta! Ken ta un maestro manera E?

²³Ken por bisa Dios loke E tin ku hasi? Ken por bis'É: “Bo a hasi malu?”

²⁴Hende semper a kanta su alabansa. Kòrda p'abo tambe alab'É pa loke El a hasi!

²⁵Tur hende a mira Dios su obranan, maske ta djaleu.

²⁶Sí, Dios ta grandi, nos no tin un idea kon grandi E ta; nos no por kalkulá su edat.

²⁷E ta hala gota di awa trese shelu i ta laga nan evaporá, bira áwaseru.

²⁸E ta laga awa basha for di nubianan i serena drep riba humanidat.

²⁹Ken ta komprondé kon nubianan ta move i kon bos ta grita for di su kas selestial?

³⁰E ta laga rayonan di welek kòrta den shelu, pero fondo di laman ta keda skur.

³¹Pa medio di áwaseru i kandela di welek Dios ta husga pueblonan, pero ta duna kuminda na abundansia tambe.

³²E ta kohe e welek tene den su man i lag'é raka kaminda E mek e.

³³Ora hende tende bos zona nan sa ku un tormenta ta aserkando, bestianan tambe ta anunsiá mal tempu.