Read Papiamento Job 37 Bible Online

Job 37 - Papiamento bible

Job 37

¹T'asina mes! Ora mi mira tormenta, mi kurason ta bati te den mi boka.

²Paga tinu, boso tur, tende stèm di SEÑOR ku ta ronka manera bos, tende e zonido duru ku ta sali fo'i su boka!

³E ta lansa su rayonan di welek den shelu, nan ta alkansá tur huki di mundu.

⁴Despues bo ta tende un tumulto, ta su stèm mahestuoso ta resoná; bo no por soportá e welek, ora su stèm zona.

⁵Ora Dios pone su stèm ronka, hende ta keda babuká; Dios ta hasi milager ku nos no por komprondé.

⁶Pasobra E ta bisa sneu: “Kai riba mundu”, i pa medio di su poder E ta bisa: “Áwaseru kai!”, i nan ta bira basha.

⁷E tin tur hende man mará i nan mester atmití ku tur kos ta den su man.

⁸Bestianan ta drenta nan hòl i ta keda skondí ei den.

⁹Warwarú ta sali for di su kamber i bientu ta supla pone friu kòrta.

¹⁰Rosea di SEÑOR ta pone tur kos kongelá, superfisie di awa ta bira duru duru.

¹¹E ta yena nubianan yen di humedat i ta laga su rayo kòrta for di nan.

¹²Nubianan ta drei rònt manera Dios dirigí nan; nan ta obedesé su komando unda ku nan bai.

¹³Dios ta manda áwaseru pa muha tera; E por mand'é pa kastigá hende, o pa mustra nan ku E ke nan bon.

¹⁴Tende un kos akí Job! Para ketu un ratu i wak e kosnan maravioso ku Dios ta hasi.

¹⁵Akaso bo sa di ki manera Dios ta pone nubianan obedes'É i welek aparesé den su nubianan?

¹⁶Bo sa kon nubia ta flota? Ta obra maravioso di Esun, ku tin konosementu perfekto!

¹⁷Ora bo ta pará tur sodá, pasobra bientu di zùit ta pone ku airu ta muchu kayente pa bo hala rosea,

¹⁸bo por yuda Dios span e shelu antó i hasié mes duru ku koper lombrante?

¹⁹Bisa nos kiko nos lo por bis'É? Nos sintí ta tapá i nos no tin nada di bisa.

²⁰Ami lo no pidi pa papia ku Dios. Loko bo ta? Mi n' ke muri na man di Dios!

²¹Un momento solo ta skonde tras di nubianan; djis despues, ora bientu kaba di bari shelu limpi limpi, e ta bria atrobe.

²²E ora ei Dios ta bini for di nort ku splendor di oro, splendor atmirabel ku ta rondon'É!

²³Todopoderoso ta asina grandi, ku nos no por aserk'É; E ta hustu i bon i no ta oprimí hende.

²⁴P'esei tur hende tin temor di djE. Pero Dios no ta ni hasi kaso di hende, ku ta kere nan mes sabí.’