Read Papiamento Job 40 Bible Online

Job 40 - Papiamento bible

Job 40

¹I SEÑOR a bisa Job:

²‘Abo ku ker a kuminsá un kaso kontra Ami, Dios Todopoderoso, ainda bo ta keda insistí ku bo ke rospondé?’

³E ora ei Job a kontestá SEÑOR:

⁴‘Kiko ami, ku no ta nada, por bisa? No a keda mi nada otro ku tapa mi boka ku mi man.

⁵Mi a papia diferente be, pero awor sí no mas!’

⁶E ora ei SEÑOR a kontestá Job ku stèm, ku tabata sali riba e tormenta ku a lanta:

⁷‘Ken ta esun ku ta nubla e konsepto, ku Mi ke pa hende tin di Mi, papiando sin konosementu?

⁸Ta di bèrdè mes bo ke pretendé ku Mi ta inhustu i bo ke deklará Mi kulpabel, pa bo mes sali liber?

⁹Akaso bo brasa ta mes fuerte ku di Mi? Bo tambe por papia ku zonido tremendo?

¹⁰Ban mira, kubri bo mes ku poder i mahestat no, mustra Mi ku bo ta grandi i ku hende ta honra bo!

¹¹Lòs bo furia lag'é bai, si bo por djis drei wak kada persona orguyoso i humili'é.

¹²Sí, djis drei wak kada persona orguyoso i humili'é no; plèchè e malbadonan unda ku bo haña nan.

¹³Dera tur den tera, sera nan den prizòn di morto.

¹⁴E ora ei asta Ami lo honrá bo, pasobra bo a vense ku bo mes forsa.

¹⁵Wak e animal grandi ei, yamá Behemot! N' t'Ami t'esun ku a traha boso tur dos? E ta kome yerba manera bue.

¹⁶Wak su kustianan fuerte, su fuerte múskulonan di barika.

¹⁷Su rabu ta zoya manera palu di seder; su bèl ta yen di múskulo.

¹⁸Su wesunan ta manera tubu di bròns, su pianan manera bara di heru.

¹⁹E ta esun di mas grandi di Dios su kriaturanan! Ta su Kreador so por vens'é!

²⁰Sí, enberdat, serunan ta proveé kuminda p'e, miéntras ku e otro bestianan salbahe por kore hunga trankil.

²¹E ta bai drumi bou di mata di sumpiña o ta skonde den e kaña altu den muras.

²²E mata di sumpiña i kaña kantu di riu ta tap'é bou di nan sombra.

²³Ora riu borotá, e no ta spanta; e ta keda kalmu, maske ku riu Yordan subi te na su boka.

²⁴Ken lo por koh'é den trampa? Lo bo por las'é i pasa kabuya dor di su nanishi?[30]