Read Papiamento Job 41 Bible Online

Job 41 - Papiamento bible

Job 41

¹ Bo por kohe e mònster Leviatan ku bara di hak? Bo por mara su lenga ku kabuya?

²Bo por domin'é, pasando un kabuya dor di su nanishi, o un hak dor di su kakumbein?

³Akaso e ta bai roga bo pa bo tene kompashon kuné; i e ta kalanchá bo?

⁴Akaso bo ta pon'é sera un pakto ku bo, pa bira bo katibu henter su bida?

⁵Bo por hunga kuné manera ku para mansu i mar'é na kabuya pa bo katibunan muhé dibertí nan mes kuné?

⁶Piskadónan lo diskutí kuantu e ta kosta? Komersiantenan lo kòrt'é na mochi i bend'é?

⁷Bo por yena su kurpa yen di harpun, su kabes yen di anzue?

⁸Purba mishi kuné, si bo por! Bo no ta biba lubidá e kos ei hamas i nunka mas bo n' ta sinti gana di bolbe hasié tampoko!

⁹Esun ku kere ku nan por koh'é, ta sali gañá. Mira so bo mir'é, bo ta kai pechu ariba di spantu!

¹⁰No tin hende ku basta kurashi pa reta Leviatan. Ta kon por tin hende antó, ku basta kurashi pa reta Ami?

¹¹Ken por enfrentá Mi i mustra Mi ku Mi mester paga debe? Tur kos bou di shelu ta di Mi.

¹²Mi ta bai papia tokante pianan di Leviatan i konta bo kon ekstraordinario i elegante e ta.

¹³Ken por soya su kueru; kiko por penetrá su korasa dòbel?[31]

¹⁴Ken ta tribi span su boka habri, e boka ei yen di djente horibel?

¹⁵Su blatnan di lomba[32] ta kareda di eskudo duru seyá un riba otro,

¹⁶dje duru ei pegá riba otro, ku ni airu no por pasa meimei di nan,

¹⁷dje uní ei ku otro, ku niun hende no por separá nan.

¹⁸Ora e nister, bo ta mira lus reflehá, su wowonan ta kòrá manera solo ku ta sali.

¹⁹Kandela ta brota fo'i su boka i spat sali.

²⁰Huma ta sali fo'i su burak'i nanishi, manera dam for di un ketel ku ta herebé.

²¹Su rosea ta sende kandela; vlam ta sali fo'i su boka.

²²Su nèk ta sentro di su forsa, tur ku enfrent'é, ta keda terorisá.

²³Asta e parti ku karni na su kurpa ta duru, impenetrabel, manera heru bashá.

²⁴Su kurason ta manera piedra, mes duru ku piedra di mulina.

²⁵Ora Leviatan lanta, asta diosnan ta spanta; miedu ta poderá di nan i nan ta kore limpi bai.

²⁶No tin spada pa herid'é, lansa ni flecha ku por hasié daño.

²⁷Heru ta manera yerba seku p'e, bròns, mes fofo ku palu putrí.

²⁸Flecha no por pon'é kore bai i piedra di slengu ta un bòsh'i yerba seku p'e.

²⁹Gòlpi di chikoti ta manera sla ku pida palu seku p'e; e ta hari ora e tende lansanan flùit pasa.

³⁰Bou di su barika ta skèrpi manera pida pida wea di rikla, ora e lastra pasa den lodo e ta laga un marka atras, manera di tabla di peña tapushi.

³¹E ta laga oséano kunsumí, manera wea na kandela; e ta bòltu e awa den lago manera sa meskla salfi den paila.

³²E rastro ku e ta laga atras den awa ta manera un ola di kabei blanku i briante.

³³Riba tera no tin nada igual kuné; e ta trahá pa no sinti miedu nunka.

³⁴Asta e animal di mas orguyoso no tin niun balor p'e, e ta rei di tur bestia feros.’