Read Papiamento Job 42 Bible Online

Job 42 - Papiamento bible

Job 42

¹E ora ei Job a rospondé SEÑOR:

²‘Mi sa ku Bo por tur kos, niun hende no por stroba Bo di hasi loke Bo ke.

³Bo a puntra: “Ken ta esun ku ta nubla konsepto ku Mi ke pa hende tin di Mi, papiando sin konosementu?” Mi ta atmití ku mi a papia di asuntunan, ku mi no tabatin niun idea di dje, kosnan maravioso, inkomprensibel pa mi.

⁴Bo a pidi mi skucha, miéntras Bo tabata papia i purba rospondé bo preguntanan.

⁵Den pasado ta solamente loke otro hende a konta mi di Bo mi tabata sa, pero awor m'a mira Bo ku mi propio wowo.

⁶P'esei mi ta humiliá mi mes i mi ta hala mi palabranan atras abiertamente, sintá den stòf i shinishi.’

⁷Despues di a papia ku Job, SEÑOR a dirigí su mes na Elifaz di Teman: ‘Mi ta mashá rabiá ku bo i bo dos amigunan, pasobra boso no a krea un konsepto korekto di Dios, manera mi sirbidó Job sí a hasi.

⁸P'esei boso mester kohe shete toro i shete karné i bai serka mi sirbidó Job. Boso mester ofresé nan manera sakrifisio di kandela pa boso mes. Mi sirbidó Job lo resa pa boso i Ami lo aseptá su orashon i Mi no ta hasi boso ningun daño, ounke boso meresé esei, ya ku boso den boso eror no a krea un konsepto korekto di Mi, manera mi sirbidó Job sí a hasi.’

⁹Elifaz, Bildad i Sofar a bai hasi loke SEÑOR a ordená nan i SEÑOR a aseptá e orashon di Job.

¹⁰Despues ku Job a kaba di resa pa su amigunan, SEÑOR a hasié riku atrobe i a dun'é dos be mas tantu di loke e tabatin promé.

¹¹E ora ei tur su rumannan, hòmber i muhé, i hende ku tabata konos'é ántes a bini su kas bin kome kuné. Nan a konsol'é pa tur e problemanan ku SEÑOR a manda p'e i kada un a dun'é pida plata i un renchi di oro.

¹²I SEÑOR a bendishoná Job mas ku ántes. El a haña 14.000 karné, 6000 kamel, 1000 par di bue mará na yugo i 1000 buriku muhé.

¹³Job a haña shete yu hòmber i tres yu muhé.

¹⁴Su yu muhé mayó el a yama Yemima, e di dos Kesia i esun mas chikí Kèrèn-Hapuk.

¹⁵Nan tabata e mucha muhénan di mas bunita ku tabatin. Nan tata a laga nan kompartí e herensia ku nan ruman hòmbernan.

¹⁶Despues Job a biba 140 aña mas; el a muri na un edat mashá altu. El a mira su yunan, ñetunan, bisañetunan i tumañetunan.