Read Papiamento Job 5 Bible Online

Job 5 - Papiamento bible

Job 5

¹Sigui pidi yudansa numa, niun hende no ta rospondé bo. Ken bo tin serka di Dios ku por intervení pa bo?

²Kere mi, solamente hende bobo ku nan morto ta yag nan, ta kunsumí asina; ta hende sin sintí ta laga rabia kaba ku nan.

³Mi eksperensia ta: un hende nesio ta manera un palu ku fásilmente ta tira rais, ma mes lihé tur kos ta kaba p'e.[2]

⁴Su yunan no ta seif niun kaminda. Otro hende ta probechá di nan den korte, nan no ta skapa.

⁵Hende ku hamber ta kome e nesio su kosecha, maske ta fo'i bou di sumpiña nan tin ku sak'é; hende morto di set ta anhelá su rikesanan.

⁶Pasobra mizeria no ta krese di mes, problema no ta spreit fo'i tera;

⁷nò! Ta hende ta kousa nan, mes sigur ku chispa ta sali fo'i kandela.[3]

⁸Si tabata ámi lo m'a konsultá Dios i present'É mi kaso,

⁹pasobra Dios ta hasi kosnan asina grandi, ku mente di hende no por skrudiñá, asina tantu milager, ku no por kaba di konta nan.

¹⁰E ta manda yobida riba mundu, laga awa kai riba kunukunan;

¹¹E ta alsa hende humilde; esnan trapá lo kana kara na laria.

¹²E ta desbaratá plannan di hende astuto, di manera ku nan no por realisá nan mas.

¹³E ta kohe e astuto den su mes trampa i kaba ku e chake di e gañadó den un fregá di wowo.

¹⁴Di dia kla nan tur lo topa ku skuridat, den pleno lus di dia nan lo tira man, fula, manera hende siegu den skuridat.

¹⁵Pero hende indefenso E ta salba fo'i boka ku djente skèrpi manera spada, fo'i gara di poderosonan.

¹⁶Di manera ku hende débil por karga speransa i inhustisia su boka ta keda será.

¹⁷P'esei felis e hende ku SEÑOR skual; e no mester tuma na malu ora SEÑOR todopoderoso koregié.

¹⁸Pasobra SEÑOR ta habri herida pero E mes ta mara nan; E ta heridá, pero su man mes ta kura.

¹⁹Si bo haña bo den seis problema, shete pèrtá, sin sa ki banda bo kohe, E ta libra bo kada be di nobo i nada malu n' ta pasa bo.

²⁰Den tempu di hamber E ta ranka bo for di morto; den tempu di guera E ta libra bo di poder di spada.

²¹E ta spar bo di mala lenga i lo bo no tin miedu di kos malu ku presentá.

²²Ni hamber ni destrukshon lo no ta preokupashon pa bo, bestia feros lo no spanta bo.

²³Lo no tin piedra den kunuku pa stroba bo trabou i bestia di mondi lo laga bo na pas.

²⁴Bo por konta ku den bo kas tin seguridat, ora bo bai wak bo karnénan, tur lo t'ei.

²⁵Bo por konta ku lo bo tin hopi desendiente, nan lo ta manera yerba ku ta krese tur kaminda.

²⁶Bo ora di muri ta yega ora bo alkansá e edat apropiá; manera e momento pa dakuná maishi ta yega ora ta tempu pa kosech'é.

²⁷Job, nos eksperensia di bida a siña nos esei, pens'é i tum'é na serio.’