Read Papiamento Job 6 Bible Online

Job 6 - Papiamento bible

Job 6

¹E ora ei Job a kontestá:

²‘Ai, mare por tira mi angustia i tur mi desgrasianan den balansa.

³Nan lo pisa mas tantu ku santu di laman, p'esei mi palabranan a sali asina duru.

⁴Pasobra SEÑOR Todopoderoso ta yena mi kurpa ku flecha i mi alma ta bebe nan venenu; Dios a pone tur mi kastigunan den fila kontra mi.

⁵Si un buriku di mondi tin yerba e tin pakiko grita? Un baka ku haña kuminda ta grita? Nò!

⁶Kuminda sin salu no ta drenta mi boka; blanku di webu tin ménos smak ainda.

⁷Ami sí no por kome e kosnan ei, nan ta rel mi!

⁸Ai, mare mi por haña loke mi ta pidi, mare Dios por duna mi loke mi ta deseá.

⁹Mare E por hasi algu lihé i kaba ku mi, saka man i kòrta hilu di mi bida.

¹⁰E ora ei ainda ta ún konsuelo so ta keda mi, ku nunka mi no tabata infiel na Dios Santu i esei lo pone mi hubilá a pesar di e doló inmenso.

¹¹Mi no tin forsa pa warda e asina yamá final felis. Pakiko tene pasenshi? E bida akí no tin nada mas pa ofresé mi.

¹²Mi no ta di piedra, ni di heru, ami sí ta sinti doló.

¹³Frankamente bisá, mi no por yuda mi kurpa, mi no sa kon biba mas.

¹⁴Hende ku no ta mustra amor pa nan amigunan, no por mustra[4] rèspèt pa Dios Todopoderoso tampoko.

¹⁵Boso mi kompañeronan, kua kompañero kiko! Boso no ta di konfia, boso ta manera roi den seru altu: promé e ta yen yen di awa dje eis ku a dirti i dje sneu ku a larga, pero asina verano yega, e ta seka, i bo por mira te na fondo; e roi a disparsé.

¹⁸Ken ku desviá di nan kaminda pa buska su awa ta resultá den desierto i ta haña nan morto.

¹⁹Karavananan di Tema ta buska awa, komersiantenan biahero di Seba ta yen di speransa,

²⁰pero ora nan yega, desilushon ta warda nan, tur nan speransa ta muri.

²¹Boso ta desapuntá mi manera e roinan ei, ora boso a mira mi situashon horibel, boso a spanta.

²²Akaso m'a roga boso nunka pa duna mi algu? M'a yega nunka di pidi boso hasi mi e fabor di soborná ningun hende ku boso rikesa?

²³Nunka m'a pidi boso pa libra mi di un atversario o paga mi reskate pa libra mi di gara di hende poderoso?

²⁴Siña mi i lo mi sera mi boka; mustra mi unda mi a faya.

²⁵Palabra honesto ta konvensé hende, pero loke boso ta bisa ta sin pia sin kabes.

²⁶Boso ta kere ku palabra so ta regla asuntu, miéntras ku mi palabranan sí, yen di desesperashon, no ta konta pa boso?

²⁷Boso ta kapas di riska tira lòt pa disidí destino di un wérfano i asta di bende boso mihó amigu!

²⁸Mi ta pidi bo, wak mi den mi kara, akaso bo n' ta mira ku mi no ta gaña?

²⁹Stòp ku bo akusashonnan, no kondená mi, pasobra mi no a hasi nada malu.

³⁰Akaso boso ta kere ku mi boka ta papia mentira, ku mi lenga no ta kapas di pruf bèrdat?