Read Papiamento Job 9 Bible Online

Job 9 - Papiamento bible

Job 9

¹E ora ei Job a tuma palabra:

²‘Ai sí, mi sa tur e kosnan ei kaba, pero kiko un hende mester hasi awor pa Dios deklar'é hustu?

³Kon e por pleita su kaso dilanti di djE? Dios por hasi mil pregunta, ku niun hende no por kontestá.

⁴Dios ta grandi na poder i sabiduria. Ken por konfront'É i sali ileso?

⁵Dios ta sakudí serunan sin atvertí, E ta basha nan abou den su rabia.

⁶E ta laga mundu tembla: mundu ta lòs i tambaliá riba su fundeshi.

⁷E por stòp solo di bria i por paga lus di streanan.

⁸E so ta span shelu E so ta dominá poder di laman.[7]

⁹T'E a krea konstelashon di strea: Oso Mayó, Orion, Pleiades i esunnan parti zùit.

¹⁰Pasobra ya...Dios ta hasi kosnan asina grandi, ku mente di hende no por skrudiñá; asina tantu milager, ku no por kaba di konta nan.

¹¹Si E kana pasa banda di mi, ami lo no mir'É, E ta slep pasa bai, sin ku mi por ripará.

¹²Ken lo stòp E di kohe algu? Ken lo puntr'É: “Kiko Bo ta hasi?”

¹³Dios no ta laga nada plakia su rabia, asta Rahab i su ayudantenan mester a baha kabes p'E.

¹⁴Awor, ku ki palabra ami por rospondé Dios; ku ki argumento defendé mi mes?

¹⁵Maske kon inosente mi ta, mi no por defendé mi mes; E ta mi hues i ta solamente klemensia mi por pidiÉ.

¹⁶Si mi dagfar E i E presentá, mi n' ta kere ku lo E skucha mi stèm.

¹⁷E ta machiká mi pa un bagatèl, E ta heridá mi kada be di nobo, sin motibu.

¹⁸E no ta duna mi ni chèns di hala rosea, E ta yena mi bida ku sufrimentu.

¹⁹Si ta trata di poder, E ta Esun di mas fuerte; si ta trata di huisio, ken lo por dagfar E?[8]

²⁰Ounke mi ta inosente mi mes boka ta kondená mi. Ounke mi ta sin falta, e ta proba ku mi ta kulpabel.

²¹Mi ta inosente, pero no ta importá; ya mi ta kansá di biba.

²²Tantu bal! Ata loke mi ta pensa akí: E ta kita tantu bida di hende kulpabel komo di hende inosente.

²³Ora desaster okashoná morto, Dios ta hasi bofon di sufrimentu di hende inosente.

²⁴No ta Dios ta duna hende malbado poder riba mundu? N' t'E ta siega wowo di huesnan pa nan no husga imparsialmente? Si no ta Dios ta hasi tur e kosnan akí, ta ken ta hasi nan antó?

²⁵Mi dianan ta kore pasa mas lihé ku koredó den kareda i nan no ta trese nada bon pa mi.

²⁶Mi dianan ta kore pasa lihé, manera barku di bela ku ta nabegá ku spit, manera águila ku ta skuer pasa riba sabana.

²⁷Si mi bisa: “Mi ta bai lubidá mi keho kontra Dios, traha un kara kontentu i bira alegre,”

²⁸tòg mi ansha no ta duna mi ora i porta, pasobra segun Abo mi no ta inosente.

²⁹Maske kiko pasa, mi ta resultá kulpabel; pakiko kansa mi kurpa por nada antó?

³⁰Maske mi baña mi kurpa ku e awa di mas puru i laba mi mannan ku soda gròf,

³¹Abo ta bolbe benta mi den un buraku yen di sushi i asta mi mes paña na mi kurpa ta sinti asko di mi.

³²Dios no ta hende, manera ami; sino lo m'a kuminsá un kaso kontra djE i nos dos lo a bai hues.

³³Mare tabatin un mediadó[9] pa skucha nos tur dos; un pa intermediá den nos.

³⁴Un pa kita bulpes di Dios for di riba mi lomba, ya mi miedu p'E por a disparsé.

³⁵E ora ei sí lo mi por a papia liber i sin temor, pero nò, esei no ta konta pa mi.